QAXDA YENİ RABİTƏ OBYEKTİ İSTİFADƏYƏ VERİLMİŞDİR
Qax rayonunun Güllük kəndində 512 nömrə tutumu olan elektron tipli yeni ATS istifadəyə verilmişdir. Stansiyada Türkiyənin “Karel” şirkətinin istehsal etdiyi DS-200 markalı rabitə avadanlığı quraşdırılmışdır. Hazırda kənddə mövcud abonentlərin yeni stansiyaya qoşulması və yeni abonentlər üçün xətt şəbəkəsinin tikintisi həyata keçirilir.
Rayon telekommunikasiya qovşağından AZƏRTAC-a bildirmişlər ki, bu günlərdə mərkəzi ATS-də 400 nömrəlik yeni nəsil CDMA simsiz rabitə şəbəkəsi də quraşdırılıb sakinlərin istifadəsinə verilmişdir. Bundan əlavə, cari ilin sonunadək Marsan və Oncallı kəndlərində 512, Qaşqaçay və Cəlayir kəndlərində isə 256 nömrə tutumu olan elektron tipli yeni ATS-lərin quraşdırılması nəzərdə tutulur.
Bölmənin digər xəbərləri
