Qazaxıstan oğuzların paytaxtı Jankentin olduğu XI əsrə aid nadir xəritənin surətini alıb
Astana, 9 sentyabr, AZƏRTAC
Qazaxıstan Milli Əlyazmalar və Nadir Kitablar Mərkəzinin kolleksiyası qiymətli tarixi eksponatla zənginləşib.
AZƏRTAC Qazaxıstan Respublikasının Mədəniyyət və İnformasiya Nazirliyinin mətbuat xidmətinə istinadla xəbər verir ki, Böyük Britaniya səfirliyi Oksford Universitetinin Bodleyan Kitabxanasında saxlanılan Mərkəzi Asiya xəritəsinin bir nüsxəsini mərkəzə hədiyyə edib.
Bu artefakt XI əsrə aid kosmologiya və coğrafiyaya həsr olunmuş “Kitab ğəraib əl-funun və mulah əl-uyun” (“Heyrətləndirici elmlər və göz zövqləri kitabı”) adlı anonim əsərin yeganə məlum nüsxəsidir.
Tədqiqatçıların fikrincə, əlyazma XII əsrin sonu – XIII əsrin əvvəllərində Misirdə yaradılıb. Xəritədə digər obyektlərlə yanaşı, müasir Qazaxıstan ərazisində yerləşən Jankent şəhəri göstərilir. Ərəb mənbələrində “Əl-ğariə əl-hədis” (“Jana kala”) kimi xatırlanır.
VIII-XI əsrlərdə Jankent Oğuz dövlətinin paytaxtı kimi fəaliyyət göstərib. Xəritədə Qazaxıstanın cənub bölgəsinin ən mühüm şəhərləri də göstərilir. XI əsrə aid xəritə Orta Asiya və müasir Qazaxıstan ərazisini əhatə edir və yüksək elmi, mədəni və milli əhəmiyyətə malik nadir tarixi-coğrafi mənbədir.
AZƏRTAC-ın xüsusi müxbiri
Astana
Bölmənin digər xəbərləri
