QƏBƏLƏ RAYONUNUN KƏNDLƏRİNDƏ YENİ ELEKTRON ATS-LƏR QURAŞDIRILMIŞDIR
AZƏRTAC xəbər verir ki, Qəbələ rayonunda əhaliyə göstərilən rabitə xidmətinin keyfiyyətinin yüksəldilməsi istiqamətində görülən işlər uğurla davam etdirilir.
Son bir ayda rayonun Bılıx, Çuxur Qəbələ, Bunud və Nohurqışlaq kəndlərinin hər birində 256 nömrəlik, Aydınqışlaq kəndində isə 384 nömrəlik elektron ATS üçün yeni binalar tikilmiş, avadanlıq quraşdırılmışdır. 28 May - Respublika günündə ATS-lərin istifadəyə verilməsi nəzərdə tutulur. Qəbələ şəhərindəki mərkəzi ATS-də isə 304 ədəd yeni nömrə açılmış və abonentlərin istifadəsinə verilmişdir.
İlin sonunadək Tikanlı kəndində 256 nömrəlik, hərbi şəhərcikdə isə 608 nömrəlik elektron ATS-lərin quraşdırılması planlaşdırılır. Bununla da, Qəbələ rayonundakı bütün yaşayış məntəqələrinin müasir tələblərə cavab verən rabitə vasitələri ilə əhatə olunması prosesi başa çatdırılacaqdır.
Hazırda Qəbələdə 58 kəndi əhatə edən 24 elektron ATS fəaliyyət göstərir. Son bir ildə Qəbələ rayonunun ucqar dağ kəndləri olan Solquca, Laza, Dandıx və Məmmədağalı kəndlərində peyk rabitələri quraşdırılmışdır. Qəbələ Rayon Telekommunikasiya Qovşağı hazırda 9.628 abonentə xidmət göstərir. Yeni ATS-lər istifadəyə verildikdən sonra abonentlərin ümumi sayı 11 mindən artıq olacaqdır. Bundan əlavə, hazırda Qəbələ Rabitə Evi əsaslı təmir olunur. Qəbələ Rayon Telekommunikasiya Qovşağının və rayon poçtamtının yerləşdiyi üçmərtəbəli binanın dam örtüyü, qapı və pəncərələri, döşəməsi, tavanı yenidən qurulur, fasad hissəsinə alkopan üzlük çəkilir. Hazırda binada son tamamlama işləri görülür.
Ölkəmizin bütün bölgələrində olduğu kimi, Qəbələ rayonunda da əhalinin müasir standartlara uyğun informasiya-kommunikasiya texnologiyalarından istifadəsi üçün səmərəli tədbirlər görülür, abonentlərin beynəlxalq rabitə xəttinə çıxışının təmin olunması istiqamətində geniş iş aparılır. Bu günlərdə ilk dəfə olaraq Qəbələ-Ağdaş ATS-ləri arasında 55 kilometr uzunluğunda fiber-optik (f 012) beynəlxalq magistral kabel xəttinin çəkilişinə başlanılmışdır.
Ağdaş rayonunun ərazisindən keçən Trans-Asiya-Avropa (TAE) Beynəlxalq Rabitə Xəttinin imkanlarından gələcəkdə Qəbələ əhalisi də istifadə edə biləcəkdir.
