“Qırmızı Şaman” Saxalı qardaşlar üçün hədiyyə kimi...
Bakı, 28 dekabr, AZƏRTAC
Saxa (Yakutiya) ədəbiyyatının klassiki Platon Oyunskinin 125 illiyi münasibətilə Saxalı qardaşlar üçün nəfis şəkildə çap edilmiş kitab-hədiyyə hazırlanıb.
Tərcümə etdiyi əsərə “Ön söz” yazan Aida Eyvazlı AZƏRTAC-a bildirib ki, “Qırmızı Şaman” kitabının məsləhətçiləri Saxa (Yakutiya) Respublikasının deputatı, Saxanın fəxri vətəndaşı Əliş Məmmədov və Saxa Yazıçılar Birliyinin başçısı, Xalq şairi Natalya Xarlampyeva, rəyçiləri isə Azərbaycan Milli Məclisinin deputatları akademik Nizami Cəfərov və Cavanşir Feyziyevdir.
“Platon Oyunskinin əsərləri ilə tanış olduqca, onu yaxından tanıdıqca, gözlərim qarşısında Hüseyn Cavidin və onun yaratdığı obrazlar canlandı. Saxa sovet yazıçısı, ictimai xadim, filoloq və dilçi alim, saxa ədəbiyyatı klassikinin həyata, insanlara, Tanrıya münasibətində o qədər eynilikləri gördüm, hərdən mənə elə gəldi ki, türk dünyasının bu iki şəxsiyyəti öz əsərlərini yazmamışdan öncə birlikdə oturub söhbət edib. Lakin daha dərindən düşünəndə bir daha əmin oldu ki, Stalin repressiyalarının və qanlı siyasətinin o ağır illərində öz xalqını sevən türk oğulları yalnız Hüseyn Cavid və Platon Oyunski kimi ola bilərdi”, - deyə A.Eyvazlı söyləyib.
“Qırmızı Şaman”ın redaktoru gənc yazar Taleh Mansur, koordinatorları isə Saxalı gənc yazarlar Qavril Gavril Androsovla Rustam Kazhenkindir.
Kitab “Zərdabi” nəşrlər evində işıq üzü görüb.
Nəşrin 2019-cu ildə Azərbaycan və Saxada təqdimatı keçiriləcək.
Bölmənin digər xəbərləri
