Qızılxallı farel balığı necə yetişdirilir? – Xaçmazdan REPORTAJ VİDEO
Xaçmaz, 14 fevral, Elxan Yusifli, AZƏRTAC
Xaçmazda yaradılan balıqçılıq təsərrüfatında qızılxallı farel balığı yetişdirilir. Təsərrüfatda satışa il ərzində 20 tondan çox balıq çıxarılır.
AZƏRTAC-ın bölgə müxbiri xəbər verir ki, rayonun Qusarçay kəndində yerləşən balıqçılıq təsərrüfatı 2017-ci ildən fəaliyyət göstərir. Farel balıqları bol oksigenli təmiz suyun dövr etdiyi qapalı hovuzlarda bəslənir.
Təsərrüfatın rəhbəri Şahin Qulubəyov bildirir ki, müəssisədə balıqyetişdirmə prosesi tam əhatə olunub. Balıqlar kürüdən çıxandan sonra üç mərhələdə inkişaf dövrü keçərək bir il müddətində hovuzlarda bəslənilir: “Balıq ovu mənim ən çox sevdiyim məşğuliyyətlərdəndir. Bu təsərrüfatın yaradılmasında da hobbimin rolu böyükdür. Biz balıq kürüsünü Fransa və İtaliyadan gətiririk. İnkubatorda kürüdən çıxan balıqlar qapalı şəraitdə 15-20 qramadək böyüdükdən sonra hovuzlara buraxılır. 32 kubmetr həcmindəki bir hovuza əvvəlcə 5 minə yaxın kiçik balıq buraxırıq. Sonradan balıqlar böyüdükcə digər hovuzlara bölüşdürülür. Çünki hovuzda hər bir balığa çatacaq qədər oksigen və qida lazımdır”.
Hovuzlarda bəslənən farel balıqları 350-400 qram olandan sonra satışa çıxarılır. Təsərrüfatda çəkisi iki kiloqramadək olan balıqlar da satılır. Müştərilər arasında restoranlar, marketlər, eləcə də fərdi müraciət edən şəxslər var. Farel balığının bir kiloqramı alıcılara 13 manata təqdim olunur. Bəzi fermerlər də var ki, buradan topdansatış qiymətə 350 qramlıq farel balıqlarını alıb öz təsərrüfatlarında yerişdirirlər. Balığın topdansatış qiyməti 1-1,5 manat ucuz olur.
“Farel balığının yetişdirilməsi olduqca çətin prosesdir. Kürüdən çıxandan 4 ay çəkir ki, farel balıqları 15-20 qram olsun. Yalnız bundan sonra hovuza buraxılır. Bu balıqlarda bir xüsusiyyət var ki, gün ərzində öz çəkisinin 1-1,5 faizi qədər çəki alır. Yəni, balıq balaca olanda böyümə prosesi çox zəif gedir. 4-5 aya cəmi 100 qrama çatırsa, artıq növbəti 6-7 ayda çəkisini 10 dəfə artıraraq bir kiloqramdan çox olur. Biz balıqları tələbata uyğun böyüdürük. Bazarda alıcılar böyük balıq istəyirlər. Restoranlar 350-400 və ya 700-750 qramlıq balıqlara üstünlük verir”, - Şahin Qulubəyov deyir.
Təsərrüfatdakı hovuzlarda su daim dövr edərək dəyişdirilir. Eyni su ikinci dəfə hovuza axıdılmır. Təmiz suyun zəngin tərkibi, onun təbii şəkildə axar su yolu ilə təmizlənməsi, oradakı mikroelementlər balığın tez böyüməsinə səbəb olur. Yırtıcı sayılan farel balıqları daim soyuq və tərkibi minerallarla münbit olan şirin su hövzələrində yaşamağı sevirlər. Təsərrüfatda balıqlar üçün yem və xəstəliklərə qarşı dərmanlar xaricdən gətirilir.
Bölmənin digər xəbərləri
