REGİONLAR
Qusarda keçirilən beynəlxalq konfransda mədəniyyətlər, xalqlar və sivilizasiyalar arasında dialoq müzakirə olunub
![](/files/galleryphoto/2019/3/1200x630/15722667032808629452_1200x630.jpg)
![](/files/galleryphoto/2019/3/1200x630/15722667036109262145_1200x630.jpg)
![](/files/galleryphoto/2019/3/1200x630/157226670367230676_1200x630.jpg)
![](/files/galleryphoto/2019/3/1200x630/15722667034544329639_1200x630.jpeg)
![](/files/galleryphoto/2019/3/1200x630/15722667033818465301_1200x630.jpg)
Qusar, 28 oktyabr, Elxan Yusifli, AZƏRTAC
Oktyabrın 28-də Qusarda Mədəniyyət Nazirliyinin dəstəyi ilə “Simurq” Mədəniyyət Assosiasiyası tərəfindən “Dünya dəyərlərinin, humanizmin və insan həmrəyliyinin təsdiqi naminə mədəniyyətlərin, xalqların və sivilizasiyaların dialoqu” adlı beynəlxalq konfrans təşkil olunub.
AZƏRTAC-ın bölgə müxbiri xəbər verir ki, “Şahdağ” Turizm Mərkəzində keçirilən konfransda M.V.Lomonosov adına Moskva Dövlət Universitetindən, Rusiya Federasiyası Prezidenti yanında Dövlət Qulluğu və İdarəetmə İnstitutundan, “Avropa-Asiya” Beynəlxalq Humanitar Akademiyasından (Kazan), “Brahma Kumaris” Ümumdünya İlahiyyat Universitetindən (Hindistan), həmçinin digər yerli və xarici elm mərkəzlərindən alim və mütəxəssislər iştirak ediblər.
Mədəniyyət Nazirliyinin sektor müdiri Vüqar Baxışov, Qusar Rayon İcra Hakimiyyətinin başçısı Şair Alxasov konfransda çıxış edərək Azərbaycanın mədəniyyətlər və sivilizasiyalar arasında dialoq, multikulturalizm, beynəlxalq humanitar əməkdaşlıq sahələrində qazandığı uğurlardan danışıblar. Bildirilib ki, bu konfrans Qərblə Şərq xalqlarının və dövlətlərinin dayanıqlı inkişafı ilə bağlı maraqlarına cavab verdiyinə görə böyük əhəmiyyətə malikdir.
Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin direktoru Asif Usubəliyev dövlətlərin inkişafında mədəniyyət amilindən, o cümlədən dövlətlərarası sabit münasibətlərin qurulmasında mədəni mexanizmlərdən, həmçinin Azərbaycan ilə Rusiya arasında uğurlu əməkdaşlıqdan söhbət açıb.
Tədbirin moderatorları - “Simurq” Mədəniyyət Assosiasiyasının prezidenti, professor Fuad Məmmədov və UNESKO-nun Dünya Mədəniyyəti İnstitutunun rektoru, akademik Engel Tahirov iştirakçılara konfransın məqsədləri və vəzifələri haqqında ətraflı məlumat veriblər.
Bildirilib ki, tədbirin əsas məqsədi həm dövlətlər səviyyəsində, həm də qlobal məkanda beynəlxalq təkliflər və proqramlarla tanış olmaq, “homo cultureis” (mədəni insan) “istehsalı" - sosial-mədəni tərəqqi, mədəni dialoq, davamlı problemlərin həllinə elmi yardım göstərmək üçün yüksək mədəniyyətli insanlar yetişdirməkdir.
Bu problemlərin həlli üçün ən təsirli vasitələrdən biri də UNESKO-nun proqramları üzrə beynəlxalq əməkdaşlıqdır. Bununla əlaqədar Dövlət İdarəçilik Akademiyasında “Mədəniyyət qlobal problem kimi” mövzusunda UNESKO-nun Universitetlərarası Şəbəkə kafedrasının açılması ilə bağlı ilkin razılaşma əldə edilib.
Akademik Engel Tahirov rəhbərlik etdiyi “Böyük Volqa Yolu” Beynəlxalq İctimai Təşkilatının Azərbaycan bölməsinin açılması barədə də iştirakçılara məlumat verib.
Kulturoloq Fuad Məmmədov intellektual və əxlaqi inkişafı təşviq etmək, mədəni və beynəlxalq fəaliyyətlərdə yüksək mədəniyyətli insanları yetişdirmək məqsədilə bütün dünyada "Homo meritus" (Layiqli insan) beynəlxalq medalının təsis olunmasını təklif edib.
Məşhur rusiyalı kulturoloq, Rusiya Federasiyası Prezidenti yanında Dövlət Qulluğu və İdarəetmə İnstitutunun “Vətəndaş cəmiyyəti və Sosial rabitə tədqiqatları” Təhsil Mərkəzinin direktoru, Olqa Astafyeva Beynəlxalq Kulturoloqlar Assosiasiyasının və Beynəlxalq Kulturoloqlar Gününün yaradılması üçün UNESKO-ya müraciət təklifi ilə çıxış edib.
Konfrans çərçivəsində Mədəniyyət naziri Əbülfəs Qarayev “Böyük Volqa Yolu” Beynəlxalq İctimai Təşkilatının İdarə Heyətinin sədri, akademik Engel Tahirov tərəfindən milli mədəniyyətin və mənəviyyatın inkişafındakı mühüm töhfələrinə, həmçinin Azərbaycan xalqının çoxəsrlik ənənələrinin qorunması, sülh və tərəqqi naminə humanizm, sivilizasiyalararası dialoqun həyata keçirilməsində fəaliyyətinə görə “Sülhməramlı” nominasiyasında “Roza mira” qızıl medalı ilə təltif olunub.
Sonda iştirakçılar tərəfindən Azərbaycan Respublikası Hökumətinə humanitar sahəyə elmi dəstək üçün “Beynəlxalq həmrəylik və mədəni əməkdaşlıq haqqında” və “Bəşəriyyətin təhlükəsizliyi” mövzusunda qətnamələr, həmçinin iştirakçıların BMT-nin, UNESKO-nun və Azərbaycanın rəhbərliklərinə bəyannamə və müraciətləri qəbul edilib.
Mədəniyyət Nazirliyinin Xaçmaz Regional Mədəniyyət İdarəsi tərəfindən konfrans iştirakçıları üçün rəsm sərgisi və bədii proqram təşkil olunub.