RUSİYA DÖVLƏT DUMASININ SƏDRİ PRAVOSLAV KAFEDRAL KİLSƏDƏ OLMUŞDUR
AZƏRTAC xəbər verir ki, mayın 13-də Rusiya Federasiyası Dövlət Dumasının sədri Boris Qrızlov Bakıdakı pravoslav kafedral kilsədə olmuşdur.
Bakı və Xəzəryanı bölgənin yepiskopu Aleksandr ata qonağı səmimi salamlayaraq, bu məbədin tarixi, iki xalqın tolerantlığı, dostluğu və qarşılıqlı köməyindən danışdı.
Bildirildi ki, kafedral kilsə mərhum Prezident Heydər Əliyevin dövründə azərbaycanlı sahibkar və xeyriyyəçi Aydın Qurbanovun vəsaiti hesabına bərpa edilmişdir. Xristianlığın ilk dövrlərində İsa peyğəmbərin şagirdlərindən biri - apostol Varfolomey burada moizələr oxumuşdur. Apostolun nəşinin bir hissəsi bu məbəddə saxlanılır. Bir sıra konfessiyaların başçıları bu məbədi ziyarət etmişlər, Moskvanın və bütün Rusiyanın patriarxı II Aleksi də dəfələrlə burada olmuşdur.
Yepiskop bildirdi ki, mayın 16-da burada Azərbaycan xalqının ümummilli lideri Heydər Əliyevin anadan olmasının 85 illiyi şərəfinə konsert olacaqdır.
Rusiya Dövlət Dumasının sədri Boris Qrızlov respublikamıza səfərinin gedişində keçirdiyi görüşləri barədə qısa məlumat verdi və razılıq hissi ilə vurğuladı ki, MDB-də ən böyük rus diasporu Azərbaycandadır.
Görüşün sonunda Boris Qrızlov kilsəyə ikona hədiyyə etdi.
X X X
Rusiya Federasiyası Dövlət Dumasının sədri Boris Qrızlov mayın 13-də Bakıya səfərini başa çatdıraraq, axşamüstü Moskvaya yola düşdü.
######
Bölmənin digər xəbərləri
