Rusiya Federasiyası Xarici İşlər Nazirliyinin Moskva Dövlət Beynəlxalq Münasibətlər İnstitutuna Azərbaycan Respublikası vətəndaşları üçün tələbə qəbulu elan edilir
Bakı, 13 may (AZƏRTAC). 2014/2015-ci tədris ili üçün Rusiya Federasiyası Xarici İşlər Nazirliyinin Moskva Dövlət Beynəlxalq Münasibətlər İnstitutuna (Universiteti) Azərbaycan Respublikası vətəndaşları üçün tələbə qəbulu elan edilir.
Tələbə Qəbulu üzrə Dövlət Komissiyasından (TQDK) AZƏRTAC-a bildirmişlər ki, Moskva Dövlət Beynəlxalq Münasibətlər İnstitutunda (MDBMİ) Azərbaycan vətəndaşlarının təhsil alması üçün 3 yer ayrılmışdır.
Müsabiqədə iştirak etmək hüququna 2014-cü il mayın 15-dək 19 yaşı tamam olmayan, attestat qiymətləri (cari ilin məzunlarının birinci yarım il üzrə qiymətləri) 4 və 5 olan Azərbaycan Respublikasının vətəndaşları malikdirlər. Ali məktəb tələbəsi və ya məzunu olan şəxslər bu müsabiqədə iştirak etmək hüququna malik deyillər.
Müsabiqədə iştirak etmək istəyən abituriyentlər TQDK-da təşkil edilmiş Sənəd Qəbulu Komissiyasında (SQK) qeydiyyatdan keçməlidirlər (ünvan: Akademik Həsən Əliyev küçəsi 17).
Qeydiyyat 2014-cü il may ayının 14-dən 26-dək (şənbə və bazar günləri istisna olmaqla) saat 10.00-dan 17.00-dək aparılacaqdır.
SQK-ya Azərbaycan Respublikasının ali təhsil müəssisələrinə qəbul imtahanlarında iştirak etmək üçün təsdiq olunmuş “Elektron ərizə”, əvvəlki illərin məzunları orta təhsil haqqında sənədin əsli (2014-cü ilin məzunları I yarım il üzrə qiymətlər göstərilməklə buraxılış sinfində oxumaqları haqqında arayışı), şəxsiyyət vəsiqəsi, hərbi bilet və ya çаğırışçı şəhadətnaməsi təqdim edilməlidir.
Müsabiqə iki mərhələdən ibarətdir. Birinci mərhələdə abituriyentlər TQDK tərəfindən keçiriləcək test imtahanında iştirak edirlər. Beynəlxalq iqtisadi əlaqələr və beynəlxalq münasibətlər ixtisasına qəbul olunmaq istəyənlər II ixtisas qrupu üzrə, beynəlxalq hüquq ixtisasına qəbul olunmaq istəyənlər III ixtisas qrupu üzrə imtahan verirlər.
Test imtahanı 2014-cü il mayın 30-da keçiriləcəkdir.
Abituriyentlər “İmtahana buraxılış vərəqəsi”ni TQDK-nın internet saytından çap edib götürəcəklər.
Test imtahanında bölməsindən asılı olmayaraq abituriyentlərə test tapşırıqları rus dilində təqdim olunacaqdır. Abituriyentlər xarici dil fənni kimi yalnız ingilis dilini seçə bilərlər.
Test imtahanı nəticəsində 500 və daha yüksək bal toplayan, xarici dil fənnindən nisbi balı 50-dən az olmayan abituriyentlər müsahibəyə buraxılacaqlar. Müsahibə 2014-cü il iyunun 2-də keçiriləcəkdir. Müsahibədə Azərbaycan bölməsi abituriyentlərinin rus dilini, rus bölməsi abituriyentlərinin isə Azərbaycan dilini bilmə səviyyəsi (müvafiq dillərdə inşa yazmaqla), eləcə də ümumi dünyagörüşü yoxlanacaqdır.
Müsabiqədə ən yüksək nəticə göstərən 3 nəfərin namizədliyi MDBƏİ-yə ödənişsiz təhsil forması üzrə təhsil alması üçün təqdim olunacaqdır.
İkinci mərhələ MDBƏİ tərəfindən Moskva şəhərində cari il iyun ayının 27-də aparılacaqdır. Bu mərhələdə abituriyentlərin seçdikləri fakültədən asılı olmayaraq rus dilindən bilikləri (şifahi və yazılı) yoxlanacaqdır. Beynəlxalq iqtisadı əlaqələr fakültəsinə qəbul olunmaq istəyənlər bundan əlavə riyaziyyatdan da imtahan verməlidirlər.
İkinci mərhələ imtahanının məzmunu, nümunə tapşırıqları və digər zəruri məlumatları www.mgimo.ru saytından əldə etmək olar.
Qəbul olunanlardan aşağıdakı sənədlər tələb olunacaqdır: orta təhsil haqqında sənəd və onun Rusiya notariat kontorlarının biri və ya Rusiya Federasiyasının Azərbaycan Respublikasındakı konsulluğu tərəfindən təsdiq edilmiş tərcüməsi; milli pasportun surəti; 3x4 sm ölçüdə ağ-qara, parıltısız 12 ədəd fotoşəkil; xroniki xəstəliklər barədə məlumatı əks etdirən tibbi arayış; döş qəfəsi orqanlarının rentgen (flüoroqrafik) müayinəsinin nəticəsi; tarixləri göstərilməklə edilmiş peyvəndlər (tetanus, qan, difteriya, vərəm) barədə tibb müəssisəsinin möhürü ilə təsdiqlənmiş məlumat; sifilis müayinəsinin nəticəsi; VİÇ infeksiyasının olmaması barədə beynəlxalq sertifikat.
Səhifənin qısa keçidi: http://www.tqdk.gov.az/~8S44Z
Bölmənin digər xəbərləri
