Şabran, 16 iyul (AZƏRTAC, Elxan Yusifli). Şabran Rayon İcra Hakimiyyəti başçısı yanında şuranın geniş iclasında 2014-cü ilin birinci yarısında rayonda sosial-iqtisadi inkişaf sahəsində görülən işlər və qarşıda duran vəzifələr müzakirə edildi.

AZƏRTAC xəbər verir ki, iclasda cari ilin 6 ayı ərzində rayonda 379 yeni iş yerinin açıldığı, bunun 349-nun daimi iş yeri olduğu bildirildi.

Qeyd edildi ki, hesabat dövründə rayonda sənaye məhsulu istehsalı 3,6 milyon manat, kənd təsərrüfatı məhsulları istehsalı 38,8 milyon manata çatıb. Ümumi məhsul buraxılışının həcmi isə 84,7 milyon manat olub.

Diqqətə çatdırıldı ki, 2009-2013-cü illəri əhatə edən regionların sosial-iqtisadi inkişafı Dövlət Proqramına əsasən, Şabran şəhərinin qaz təchizatı yenidən qurulub. Bundan əlavə, rayonun kəndlərini qazla təchiz edən magistral qaz xətlərinin çəkilişi başa çatdırılıb. Qaz təchizatının yaxşılaşdırılması məqsədilə Ağalıq, Rəhimli, Padar, Uzunboyad kəndlərində 1225 metr yeni qaz xətləri çəkilib.

Şura iclasında bildirildi ki, Azərbaycan Respublikasının Prezidenti İlham Əliyevin tapşırığı ilə respublikanın bölgələrində infrastruktur layihələrin həyata keçirilməsi çərçivəsində Şabran şəhərinin içməli su və kanalizasiya sisteminin yenidən qurulması layihəsi başa çatdırılıb. Hazırda xətlərdə sınaq işləri aparılır.

Hesabat dövründə 11 kəndi birləşdirən, 5 min 200 nəfər əhalinin yaşadığı, 36 kilometrlik Şabran-Pirəbədil-Zeyvə yolu əsaslı təmir olunub və yol istifadəyə verilib. Şabran-Çölquşçu-Çayqaraqaşlı yolunun əsaslı təmiri üçün artıq layihə smeta sənədləri hazırlanıb.

Bu ilin 6 ayı ərzində 80 şagird yerlik Xəlilli kənd ümumi orta məktəbinin tikintisi başa çatdırılıb, 80 şagird yerlik Taxtalar kənd ümumi orta məktəbin tikintisi isə davam etdirilib.

“Samur-Abşeron suvarma sisteminin yenidən qurulması layihəsi” çərçivəsində rayonun ərazisindən yeni suvarılacaq torpaq sahələrinin ilkin inventarlaşdırılması aparılıb. Yeni suvarma sistemi 14 min 95 hektar sahəni əhatə edəcək. Onun 5 min 218 hektarı əhalinin pay torpaqlarından, 6 min 205 hektarı bələdiyyə mülkiyyətlərindən, 2 min 672 hektarı dövlət mülkiyyətindən ibarətdir.

Şura iclasında diqqətə çatdırıldı ki, dövlətimizin başçısının tapşırığına əsasən, rayon ərazisində də iri taxılçılıq təsərrüfatı yaradılması istiqamətində işlərə başlanılıb. Bu məqsədlə 3 min 2 hektar torpaq sahəsi ayrılıb və müvafiq qaydada mərkəzi hökumət orqanlarına müraciət edilib.

Şura iclasında müzakirə edilən məsələ ilə bağlı müvafiq qərar qəbul olundu.