REGİONLAR
Şahbuzda torpaqlardan səmərəli istifadə sahəsində görülən işlər və qarşıda duran vəzifələrlə bağlı müşavirə keçirilib
Şahbuz, 6 aprel, AZƏRTAC
Muxtar respublikanın Şahbuz rayonunda torpaqlardan səmərəli istifadə sahəsində görülmüş işlər və qarşıda duran vəzifələr mövzusunda müşavirə keçirilib.
Bu barədə AZƏRTAC-ın Naxçıvan bürosuna Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Xidmətindən məlumat verilib.
Müşavirədə Şahbuz Rayon İcra Hakimiyyətinin başçısı Rafael Babayev tədbirin əhəmiyyətini vurğulayıb.
Muxtar respublikada torpaqlardan səmərəli istifadə sahəsində həyata keçirilən tədbirlərdən bəhs edən Daşınmaz Əmlak və Torpaq Məsələləri üzrə Dövlət Xidmətinin rəisi Müslüm Cabbarzadə qeyd edib ki, keçirilən sessiya və müşavirələrdə Naxçıvan Muxtar Respublikası Ali Məclisinin Sədri tərəfindən muxtar respublikada əkinəyararlı torpaqlardan səmərəli istifadə edilməsi, torpaqlardan istifadəyə dövlət nəzarətinin gücləndirilməsi barədə tapşırıqlar verilib. Verilmiş tapşırıqların icrası ilə əlaqədar Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətinin mütəxəssisləri tərəfindən bütün mülkiyyət növləri üzrə torpaqlardan istifadə vəziyyəti yoxlanılır. Artıq Babək, Şərur və Kəngərli rayonlarında torpaqlardan qanunsuz istifadəyə dair monitorinqlər başa çatdırılıb, aşkar olunmuş qanun pozuntuları aradan qaldırılıb.
“Yoxlamalar keçirilən zaman adı çəkilən rayonlar üzrə torpaq qanunvericiliyinin tələblərinin pozulması, vətəndaşların dövlət və bələdiyyə mülkiyyətində olan torpaqlardan qanunsuz istifadə halları, torpaq islahatı zamanı əkin sahəsi kimi xüsusi mülkiyyətə verilmiş pay torpaqlarında qanunsuz tikililərin inşa edilməsi faktları müəyyən edilib. Bu gündən isə Şahbuz rayonunda monitorinqlərin aparılmasına başlanılır”, - deyən Müslüm Cabbarzadə vurğulayıb ki, torpağın mülkiyyətçisinin və ya digər qanuni sahibinin razılığı, yaxud dövlət və ya bələdiyyə torpağının istifadəyə ayrılması haqqında qanunvericilikdə nəzərdə tutulmuş qaydada rəsmiləşdirilmiş sərəncam olmadan torpaq sahəsini ələ keçirmə torpaq sahəsini özbaşına tutma hesab olunur. Torpaq sahəsinin özbaşına tutulması torpaqdan qanuni istifadə, ona sahiblik və onun barəsində sərəncam vermənin qaydalarını pozur, torpağın məqsədli istifadəsinə maneələr yaradır. Bu isə Azərbaycan Respublikasının cinayət qanunvericiliyinə əsasən məsuliyyətə səbəb olur.
Diqqətə çatdırılıb ki, torpaqlardan təyinatı üzrə, səmərəli və müəyyən edilmiş rejimə uyğun istifadə etmək, təbiətqoruyucu istehsal texnologiyalarını tətbiq etmək, təsərrüfat fəaliyyətində ərazinin ekoloji vəziyyətinin pisləşməsinə yol verməmək isə torpağı daha da məhsuldar edir.
Müşavirədə xidmətin Torpaq məsələləri şöbəsinin müdiri İntizar Həziyevin, Dövlət Yerquruluşu, Geodeziya və Xəritəçəkmə Layihə İnstitutunun şöbə rəisi Zülfüqar Bayramovun çıxışları dinlənilib.
Sonda müşavirə iştirakçılarının sualları cavablandırılıb, müzakirələr aparılıb.