Şahmat haqqında dəyərli kitab
Bakı, 3 aprel, AZƏRTAC
C.Naxçıvanski adına Hərbi Liseyin ana dili və ədəbiyyatı müəllimi olmuş mərhum Vəli Vəliyevin vəfatının birilliyi ilə əlaqədar onun “Şahmat milyonlarla insanın sevimli oyunudur” kitabı “Elm və təhsil” nəşriyyatında çapdan çıxıb.
Kitab Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunun multidissiplinar əlyazmalar və çap kitabları şöbəsinin qərarı ilə nəşr olunub.
İnstitutdan AZƏRTAC-a bildiriblər ki, dörd hissədən ibarət olan kitabda dərin düşünmə və təhliletmə qabiliyyətini artıran, möhkəm iradə tərbiyə edən, “ağlın gimnastikası” kimi dəyərləndirilən şahmat oyununun zəngin yaradıcı məzmunu, şahmat strategiyasının qurulması, dünyanın qabaqcıl şahmatçılarının oyun taktikası, şahmatın böyük tərbiyəvi əhəmiyyəti haqqında məlumat verilir.
Nəşri mərhumun həyat yoldaşı Laləzar Həsənova çapa hazırlayıb.
Qeyd edək ki, “Şahmat milyonlarla insanın sevimli oyunudur” əsəri Vəli Vəliyevin ikinci kitabıdır. Müəllifin “Abbasqulu ağa Bakıxanovun dilçilik fəaliyyəti” monoqrafiyası 2012-ci ildə nəşr olunub.
Bölmənin digər xəbərləri
