REGİONLAR
Salyanlı fermerlər süni mayalandırma yolu ilə heyvanların cins tərkibinin yaxşılaşdırılmasına böyük maraq göstərirlər VİDEO
Salyan, 23 dekabr, İsmayıl Cəfərli, AZƏRTAC
Salyan rayonunda əhalinin heyvandarlıq məhsullarına olan tələbatını ödəmək məqsədi ilə xaricdən alınan inəklərlə yanaşı, yerli inəklərin cins tərkibinin yaxşılaşdırılması üçün süni mayalamaya da xüsusi diqqət yetirilir. Süni mayalandırma heyvandarlıqla məşğul olan təsərrüfatçıların işinə olduqca müsbət təsir edir.
AZƏRTAC xəbər verir ki, Salyanda təsərrüfatın bir çox sahəsi kimi, heyvandarlığa da böyük maraq var, bu işlə məşğul olan ailələrin sayı hər il artmaqda davam edir. Yerli heyvandarların bir çoxu süni mayalandırmaya üstünlük verir ki, bu da nəticədə məhsul istehsalına gətirib çıxarır.
Təsərrüfatındakı heyvanları süni mayalandırmaq üçün müraciət edən fermer Rəsul Cəbiyev deyir ki, artıq mütəxəssislər tərəfindən inəklərə baxış keçirilib: “Heyvanlarımızı süni mayalandırmaqda məqsədimiz odur ki, ətlik olan heyvanlar yaxşı ət, südlük heyvanlar isə bol süd versin”.
Bu ilin 11 ayında yerli mütəxəssislər tərəfindən Salyanda 5656 baş iribuynuzlu heyvanda süni mayalanma aparılıb. Onlardan 4076 baş buzov alınıb. Hər bir baş buzova görə fermerlərə 100 manat subsidiya ödənilib. Mütəxəssislər deyirlər ki, hər ay təxminən 160-dan çox fermer süni mayalandırma üçün onlara üz tutur.
Süni mayalandırma mütəxəssisi İdrak Əliyev deyib: “Bu günə kimi 150-yə yaxın fermer mənə müraciət edib. Süni mayalanmanın əsas məqsədi odur ki, heyvanların cins tərkibi yaxşı olsun, həm də xəstəliklərin qarşısı alınsın. Ətlik cinslər 1 ildə 200-250 kilo ət, südlük cinslər isə hər dəfə 20-25 litr süd verir”.
Yerli baytar həkimlərin dediklərinə görə, süni mayalanmadan alınan buzovlar tam sağlam olur. Xarici cinslərdən süni mayalandırma yolu ilə alınan buzovlar iqlimə tez uyğunlaşır, çəkisi və südü yerli inəklərdəkindən 3-4 dəfə çox olur. Qeyd edək ki, heyvanların cins tərkibinin yaxşılaşdırılması məqsədi ilə rayonda 14 süni mayalandırma məntəqəsi fəaliyyət göstərir.
Heyvanların cins tərkibinin yaxşılaşdırılması üçün digər mühüm tədbir isə xaricdən lizinq yolu ilə cins heyvanların alınmasıdır. Bu istiqamətdə də əhali arasında maarifləndirmə işləri görülür.