İQTİSADİYYAT
“SAP AZ”ın baş direktoru: Azərbaycanda universitet alyansları ilə bir sıra proqramlar icra edirik
Bakı, 25 oktyabr, AZƏRTAC
Azərbaycanda bizim çox böyük planlarımız var. Hazırda SAP Azərbaycana böyük investisiya yatırır. Təkcə son bir ildə Azərbaycandakı əməkdaşlarımızın sayı üç dəfə artıb. Şirkətimizin hazırkı inkişaf tempi onu göstərir ki, bundan sonra SAP bizim bazara daha çox diqqət yetirəcək və Azərbaycana daha çox sərmayə qoyacaq. Yaxın gələcək üçün planlarımız olduqca böyükdür, dövlət strukturları indi xüsusilə böyük maraq göstərməyə başlayıb, dövlət qurumlarının layihələrinin sayı çoxalıb. Azərbaycandakı bəzi kommersiya strukturları SAP ilə çoxdan əməkdaşlıq edir, lakin onlar da əldə etdikləri nailiyyətlərlə kifayətlənmirlər və hər il bütün yeni texnologiyaları tətbiq etməyə davam edirlər. Bu isə bizi sevindirməyə bilməz.
Bunu AZƏRTAC-a müsahibəsində “SAP AZ”ın baş direktoru Anar Əliyev oktyabrın 25-də Bakıda keçirilən “SAP Discovery Day Baku” forumu çərçivəsində deyib.
Anar Əliyev qeyd edib ki, hər il müxtəlif ölkələrdə keçirilən SAP forumu artıq ikinci dəfədir ki, Azərbaycanda təşkil olunur. Əvvəlki tədbirlə müqayisədə SAP-a marağın açıq-aydın artması yaxşı göstəricidir və forumda qeydə alınanların və iştirak edən insanların sayı bunu göstərir.
Forumun başlanğıcında tədbirə artıq 410 iştirakçının qatıldığını deyən A.Əliyev əlavə edib: “Foruma maraq böyükdür. Bunun müştərilərimiz və tərəfdaşlarımızla daha da səmərəli işləməyə və təbii olaraq yeni layihələrə imza atacağımıza səbəb olacağını gözləyirik. İstənilən layihənin uğurlu nəticəsi kimi, müştərilərimizin müəssisələrində, sənaye həllərimizi tətbiq etdiyimiz qurumlarda biznesin yaxşılaşdığını görmək istəyirik".
Anar Əliyev bildirib ki, şirkət Azərbaycanda universitet alyansları ilə bir sıra birgə proqramlar həyata keçirməklə məşğuldur.
“Bir sıra universitetlərimiz var ki, onlarla artıq müqavilələr imzalanıb, tezliklə daha bir universitet bizimlə müqavilə bağlamaq niyyətindədir. Bundan əlavə, hazırda universitet proqramları ilə yanaşı, təhsil proqramları hazırlamaq niyyətində olan bir sıra dövlət qurumları ilə danışıqlar aparırıq. Bu, o deməkdir ki, bizdə peşəkarların və yüksəkixtisaslı kadrların - SAP mütəxəssislərinin sayı artacaq. Şəxsi təcrübəmə əsasən deyə bilərəm ki, son bir ildə təhsil proqramları ilə maraqlanan və tanımadığım insanlar mənə bununla bağlı yazırlar. Bu, SAP məhsullarına tələbin nəzərəçarpacaq dərəcədə artdığını göstərir”, - deyə A.Əliyev bildirib.