Gəncə, 7 avqust (AZƏRTAC). Mərkəzi Seçki Komissiyasının (MSK) dairə seçki komissiyalarının (DSK) üzvləri və məntəqə seçki komissiyalarının sədrləri üçün regionlarda keçirdiyi seçki hüququ üzrə üçgünlük ixtisaslaşdırılmış kurslar uğurla başa çatmışdır.

AZƏRTAC xəbər verir ki, Gəncədə fəaliyyət göstərən 123 saylı Kəlbəcər seçki dairəsi dairə seçki komissiyasında keçirilən ixtisaslaşdırılmış kurslarda DSK-nın üzvləri və məntəqə seçki komissiyasının sədrləri müzakirə olunan mövzular ətrafında fəallıq nümayiş etdirmişlər.

Kurslarda 123 saylı Kəlbəcər seçki dairəsi dairə seçki komissiyasının üzvləri, Gəncə, Göygöl, Daşkəsən və Samuxda məskunlaşan kəlbəcərlilər üçün təşkil edilmiş 16 seçki məntəqəsinin sədrləri iştirak etmişlər.

Mərkəzi Seçki Komissiyasının nümayəndələri Fərhad Eminbəyli, Bəxşeiş Əsgərov və rayon prokuroru Ariz Əliyev “Seçki subyektləri, seçki hüquqlarının pozulmasına görə məsuliyyət nəzərdə tutan qanunvericilik aktları və məsuliyyət növləri” mövzusunda məruzələri dinlənildikdən sonra “Azərbaycan Respublikası Prezidentinin seçkilərinin keçirilməsi, səslərin hesablanması və nəticələrin rəsmiləşdirilməsi. Bu istiqamətdə MSK-nın fəaliyyətinin təşkili və vəzifələri” mövzusunda seminar keçirilmişdir.

Seminarda çıxış edən dairə seçki komissiyasının üzvləri və məntəqə seçki komissiyalarının sədrləri demişlər ki, seçki prosesi çətin olmaqla yanaşı, həm də məsuliyyətli işdir. Seçkilərin təşkilində iştirak edən hər kəs bu məsuliyyəti hiss etməli, xalqın etimadını doğrultmalıdır. Ölkəmizdə bu sahədə müsbət addımlar atılmış, seçkilərin şəffaf və demokratik keçirilməsi üçün zəngin baza yaradılmışdır. Bunun üçün beynəlxalq standartlara cavab verən qanunverici aktlar təsdiq edilmişdir. Bu qanunverici aktlar Azərbaycan Respublikasında seçki praktikasının təkmilləşdirilməsi baxımından böyük uğurların qazanılmasında mühüm rol oynamışdır və söz yox ki, növbəti seçkilərdə də bu nailiyyətlər təkrar olunacaqdır.

Mərkəzi Seçki Komissiyasının regionlarda təşkil etdiyi kurslar Gəncədəki 37 saylı Nizami I, 38 saylı Nizami II, 39 saylı Kəpəz I və 40 saylı Kəpəz II seçki dairələri dairə seçki komissiyalarında da seçki prosesi ilə bağlı məruzələr dinlənilmiş, maarifləndirici seminarlar keçirilmişdir.

96 saylı Goranboy-Naftalan, 97 saylı Goranboy-Ağdam-Tərtər, 98 saylı Şəmkir şəhər, 99 saylı Şəmkir kənd, 100 saylı Şəmkir-Daşkəsən, 101 saylı Göygöl-Daşkəsən, 102 saylı Samux-Şəmkir, 103 saylı Gədəbəy və 104 saylı Gədəbəy-Tovuz seçki dairələri dairə seçki komissiyalarında təşkil olunmuş kurslarda dinləyiciləri maraqlandıran bir çox məsələlər ətrafında fikir mübadiləsi aparılmış, seçkilərin mütəşəkkil və qanunvericilin tələblərinə uyğun keçirilməsi ilə bağlı suallara aydınlıq gətirilmişdir.