İQTİSADİYYAT
Şəki şəhəri gündən-günə gözəlləşir, abadlaşır
Şəki, 25 dekabr (AZƏRTAC). Prezident İlham Əliyevin bu il sentyabrın 12-də imzaladığı “Şəki şəhərinin sosial-iqtisadi inkişafının sürətləndirilməsinə dair əlavə tədbirlər haqqında” Sərəncam bu qədim şəhərin müasirləşdirilməsi və inkişafında yeni mərhələnin başlanğıcını qoymuşdur. Sərəncamda şəhərin milli-memarlıq üslubunun qorunub saxlanması, ərazinin infrastrukturunun yenidən qurulması, şəhərin turizm potensialının genişləndirilməsi, tarixi abidələrin qorunub saxlanması və bərpa edilməsi, xalq tətbiqi sənətinin daha da inkişaf etdirilməsi və digər tədbirlərin həyata keçirilməsi nəzərdə tutulur.
Hazırda Şəki şəhəri böyük bir tikinti meydançasını xatırladır. Şəhərin Heydər Əliyev, M. F. Axundov, M. Ə. Rəsulzadə prospektlərində, Salman Mümtaz küçəsində, Teatr meydanında, park və xiyabanlarda bərpa və yenidənqurma işləri yüksək sürətlə davam etdirilir, mərkəzi xəstəxana binasının fasadı yenidən qurulur, küçə və prospektlərdə müasir işıqlandırma sistemi quraşdırılır, qədim yaşayış binaları, abidələr bərpa olunur. Bir sözlə, şəhər simasını dəyişir, müasirləşir, gözəlləşir.
AZƏRTAC xəbər verir ki, əlamətdar bayramlar - 31 dekabr - Dünya Azərbaycanlılarının Həmrəyliyi Günü və Yeni il bayramı ərəfəsində şəhərin Çələbixan məhəlləsində, Bəşir Məmmədov küçəsində yerləşən istirahət guşəsi - mini park yenidənqurma işlərindən sonra yenidən sakinlərin istifadəsinə verilmişdir.
Bu münasibətlə keçirilən mərasimdə şəhər icra hakimiyyətinin başçısı Elxan Usubov, Milli Məclisin deputatı Cavanşir Feyziyev çıxış edərək sakinləri qarşıdan gələn əlamətdar bayramlar münasibətilə təbrik etmiş, Şəkidə aparılan genişmiqyaslı tikinti-quruculuq işləri barədə danışmışlar. Qeyd olunmuşdur ki, Şəki tezliklə nəinki bölgənin, eləcə də respublikamızın ən gözəl şəhərlərindən birinə çevriləcəkdir. Ölkəmizin daha da inkişaf etməsi, iqtisadi qüdrətinin artması məqsədi ilə Prezident İlham Əliyev tərəfindən ardıcıl tədbirlərin həyata keçirildiyini, Azərbaycanın beynəlxalq aləmdə nüfuzunun durmadan artdığını vurğulayan natiqlər, Şəki əhalisi adından dövlətimizin başçısını əlliillik yubileyi münasibətilə ürəkdən təbrik etmiş, ona möhkəm cansağlığı, Azərbaycanın daha da çiçəklənməsi naminə fəaliyyətində yeni-yeni uğurlar arzulamışlar.
Sonra sakinlər parkı gəzmiş, yaradılan şəraitlə tanış olmuşlar.