SƏNGƏÇAL TERMİNALI İLƏ TANIŞLIQ
AZƏRTAC xəbər verir ki, Koreya Respublikasının Baş naziri Han Sın Sunun başçılıq etdiyi nümayəndə heyəti mayın 18-də Səngəçal neft terminalında olmuşdur.
Qonaqlar əvvəlcə Xəzər Enerji Mərkəzində karbohidrogenlərin kəşfiyyatı, hasilatı, nəqli, emalı və s. məsələləri əhatə edən zəngin eksponatlara, ölkəmizin neft-qaz sənayesi haqqında məlumatları əks etdirən fotostendlərə baxdılar, xam neft nümunələri ilə tanış oldular.
Neft terminalının nümayəndələri və Azərbaycan Respublikası Dövlət Neft Şirkətinin birinci vitse-prezidenti Xoşbəxt Yusifzadə qonaqlara mərkəz barədə ətraflı məlumat verdilər. Enerji layihələri haqqında slaydlar nümayiş etdirildi.
Qonaqlara bildirildi ki, inşasına 2001-ci ildən başlanmış terminalda tutumu 880 min barrel olan 3 xam neft çəni, baş nasos stansiyası, separatorlar, emal qurğuları və idarəetmə məntəqəsi vardır. Buraya fiberoptik rabitə kabelləri, sahildən 187 kilometr aralıda yerləşən dəniz yataqlarından sualtı neft və qaz kəmərləri çəkilmişdir.
Sonra koreyalı qonaqlar avtobusla terminalın ərazisini gəzdilər. Onlara buradakı texnoloji proseslər barədə də ətraflı məlumat verildi.
Terminalla tanışlıqdan xatirə olaraq, Koreya Respublikasının Baş naziri Han Sın Suna hədiyyə təqdim edildi.
Dünyanın ən nəhəng terminallarından biri ilə tanışlıq koreyalı qonaqlarda xoş təəssürat doğurdu.
######
 |
 |
Bölmənin digər xəbərləri
