SENTYABRDA ŞƏMKİRDƏ “QAFQAZIN ARXEOLOGİYA VƏ ETNOQRAFİYASI” MÖVZUSUNDA BEYNƏLXALQ KONFRANS KEÇİRİLƏCƏKDİR
AZƏRTAC xəbər verir ki, Mədəniyyət və Turizm Nazirliyinin, Regionların İnkişafı İctimai Birliyinin təşəbbüsü ilə orta əsr Şəmkir qalasına təşkil olunmuş ekspedisiya iyunun 1-dən yenidən bərpa edilmişdir.
Ekspedisiyanın rəhbəri, AMEA-nın Arxeologiya və Etnoqrafiya İnstitutunun şöbə müdiri, tarıx elmləri doktoru Tarix Dostiyev bildirmişdir ki, aparılan tədqiqatlar zamanı zəngin tarixi faktlar aşkar edilmişdir. Qazıntı zamanı tapılan nümunələr onu deməyə əsas verir ki, rus-İran müharibəsinin ən həlledici döyüşləri məhz bu ərazidə-qədim Şəmkir qalası yaxınlığında aparılmışdır.Həmin vaxt şəhərin Narınqala adlandırılan hissəsi rus qoşunları tərəfindən qərargah kimi istifadə olunmuşdur. Araşdırmalar nəticəsində ortaya çıxan məlumatlardan biri də odur ki, Şəmkir şəhəri bu ərazidə hələ 7-ci əsrdə mövcud olmuşdur. Aşkar edilmiş məişət və kənd təsərrüfatı alətləri, silahlar, möhtəşəm qala divarları, su və kanalizasiya sistemləri 7-8-ci əsrlərdə burada zəngin mədəni irsin mövcud olduğunu sübut edir.
Tarix Dostiyev daha sonra qeyd etmişdir ki, arxeoloji qazıntıların birinci mərhələsi sentyabrda yekunlaşacaqdır. Araşdırmaların nəticələri isə elə həmin ay Şəmkirdə keçiriləcək “Qafqazın arxeologiyası və etnoqrafiyası” mövzusunda beynəlxalq konfransda müzakirə ediləcəkdir.
Bölmənin digər xəbərləri
