Bakı, 21 sentyabr, AZƏRTAC

Səudiyyə Ərəbistanı Krallığının vəliəhdi Məhəmməd bin Salman “FoxNews” telekanalına müsahibəsində bildirib ki, İranın nüvə silahı əldə edəcəyi təqdirdə, onun ölkəsi də buna nail olacaq.

AZƏRTAC “Əl Ərəbiyə” telekanalına istinadla xəbər verir ki, Məhəmməd bin Salman İranın Səudiyyə Ərəbistanı ilə yaxınlaşmağa can atdığını, eyni zamanda, iki ölkə arasında fikir ayrılıqlarının davam etdiyini deyib. O əlavə edib ki, İran nüvə silahı əldə edərsə, Səudiyyə Ərəbistanı da bu sahədə konkret addımlar atacaq.

OPEC+ alyansının xam neftin hasilatını azaltması ilə bağlı sualını cavablandıran Krallığın vəliəhdi bildirib ki, bu, bəzilərinin iddia etdiyi kimi, Ukrayna ilə müharibədə Rusiyanı gücləndirmək məqsədi daşımır. “Hasilatın azaldılmasının əsas məqsədi qlobal neft bazarında sabitliyi təmin etməkdir. Biz tələblə tədarük arasında dəyişikliyi diqqətlə izləyirik və konkret addımlar atırıq”, -deyə Məhəmməd bin Salman vurğulayıb. O əlavə edib ki, Ər-Riyad Rusiya və Ukrayna ilə yaxşı dostluq əlaqələrinə malikdir və müharibənin başa çatması istiqamətində səylərini davam etdirir.