Bakı, 27 iyul, AZƏRTAC

“Azərişıq” ASC daim innovativ və texnoloji yenilikləri tətbiq edir. Vətəndaş məmnunluğunu və əlçatanlığı artırmaq məqsədilə həyata keçirilən növbəti belə yenilik SİMA yeni nəsil rəqəmsal imzanın “Azərişıq”ın sisteminə inteqrasiyası olub.

AZƏRTAC xəbər verir ki, bu sözləri ASC-nin İnformasiya Texnologiyaları Departamentinin direktoru Qalib Həmidov deyib.

O bildirib ki, ölkəmizdə həyata keçirilən rəqəmsal transformasiya layihələri çərçivəsində “AzInTelecom” MMC tərəfindən yaradılan SİMA yeni nəsil rəqəmsal imza ilə “ASAN Login” sistemi üzərindən “eGov” Elektron Hökumət və ya “e-service.azerishıq.az” portalına daxil olan vətəndaşlar “Azərişıq”ın “Əhali abonentinin enerji təchizatı şəbəkəsinə qoşulması” xidmətinə müraciət edərkən sənədləri SİMA ilə daha rahat imzalaya bilərlər.

“Abonentlərə olduğu məkanı tərk etmədən “Azərişıq”ın “Əhali abonentinin enerji təchizatı şəbəkəsinə qoşulması” xidmətində enerji alqı-satqı müqaviləsi və texniki şərtin verilməsi barədə müraciətlərini SİMA vasitəsilə təsdiqləmək imkanı yaradılıb. Tətbiq edilən bu rəqəmsal transformasiya ilə abonentlər vaxt itkisinə yol vermədən, eləcə də imza üçün ödəniş etmədən bu xidmətlərdən yararlana bilərlər. Növbəti mərhələdə isə əhali istehlakçısının ad dəyişdirilməsi zamanı enerji alqı-satqı müqaviləsinin SİMA ilə təsdiqi mümkün olacaq”, - deyə Qalib Həmidov qeyd edib.

Daha sonra yeni nəsil rəqəmsal imzanın üstünlüklərindən danışan İnnovasiya və Rəqəmsal İnkişaf Agentliyinin müşaviri Rəşad Xalıqov diqqətə çatdırıb ki, sentyabrdan bulud əsaslı bu rəqəmsal imzadan (SİMA) hüquqi şəxslər də yararlana biləcək: “Hüquqi şəxslər üçün rüsumlarla bağlı məsələlər sentyabrda ictimaiyyətə açıqlacanaq”.

Əlavə məlumat əldə etmək üçün “Azərişıq” ASC-nin “199” Çağrı mərkəzi, “sima.az” saytı və ya “157” Çağrı mərkəzi ilə əlaqə saxlamaq mümkündür.