Şinzo Abe: Yaponiya Çin-Şimali Koreya sammiti barədə məlumatı təhlil edəcək
Tokio, 28 mart, AZƏRTAC
Yaponiyanın Baş naziri Şinzo Abe bildirib ki, ölkəsi bu günlərdə keçirilən Çin-Şimali Koreya sammiti barədə məlumatları toplayaraq təhlil edəcək. Tokio bu məqsədlə görüş barədə ətraflı məlumatın təqdim olunması üçün artıq Pekinə müraciət edib.
AZƏRTAC NHK telekanalına istinadla xəbər verir ki, Ş.Abe belə bir şərhlə parlamentin yuxarı palatasının komissiyalarından birinin martın 28-də keçirilən iclasında çıxış edib.
Baş nazirin sözlərinə görə, Şimali Koreyanın Çin tərəfinə bu görüşü koreyalararası danışıqlar və ABŞ-Şimali Koreya sammitinə qədər keçirilməsi üçün müraciət etdiyi barədə məlumatlar var.
Baş nazir deyib ki, Şimali Koreyanın rəftarında baş verən bu dəyişikliklər Çin və Rusiya da daxil olmaqla beynəlxalq ictimaiyyətin Pxenyana göstərdiyi təzyiqlərin nəticəsi olaraq meydana gəlib. Yaponiya bu beynəlxalq kampaniyada aparıcı rol oynayıb. O, həmçinin qeyd edib ki, bu proseslər zamanı əsas diqqət yalnız danışıqlara deyil, Şimali Koreyanın nüvə silahından və raketlərdən imtinasına yönəldilməlidir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
