ŞİRVANŞAHLAR SARAYINDA AVROPA ART-MİKSİ
AZƏRTAC xəbər verir ki, iyunun 21-də “Şirvanşahlar sarayı” tarix-memarlıq kompleksində “Musiqi bayramı-2008” tədbiri keçirilmişdir. Tədbir Fransanın ölkəmizdəki səfirliyi tərəfindən Azərbaycan Mədəniyyət və Turizm Nazirliyi ilə birgə təşkil edilmişdir.
Musiqi bayramı Tifen Rikordelin orijinal ideyası əsasında Devid Lebin xüsusi kolleksiyasından seçilmiş eksponatlardan ibarət “Fransada vinil plastinkaların tarixindən” adlı sərginin açılışı ilə başlanmışdır. Ekspozisiyada nümayiş etdirilən vinil disklərin nəfis tərtibatlı cildləri əslində Edit Piaf, Co Dassen, Klod Fransua, Jak Brel, Rito Mitsuko və başqa məşhur fransız ifaçılarının yaradıcılığının qısa tarixidir. Bütün dünyada bir neçə nəslin nümayəndələri bu musiqiçilərin ifaçılarının sədaları altında oxumuş və rəqs etmişdir.
Fransa səfirliyinin əməkdaşı xanım Valeri Leqoşenin sözlərinə görə, 1982-ci ildən başlayaraq hər il keçirilən musiqi bayramının məqsədi Fransa və Avropa musiqisini təbliğ etməkdir. V.Leqoşe demişdir: “Dünyanın bir sıra ölkələrində bu cür tədbirlər uğurla keçir. İndi qədim Şirvanşahlar sarayının divarları arasında səslənən Avropa musiqisi hamıya zövq verir.
Xanım V.Leqoşe haqlı idi: az sonra Barri Kreyford (fleyta), Oren Fader (gitara) və Eleanor Valkenburqdan (vokal) ibarət “Poetica Musica” triosu bayrama qoşuldu. Bu ansambl Amerika klassiklərinin əsərlərini ifa etdi.
Sonra tədbir fransız disk-jokeyi Devid Lebin təqdimatında maraqlı proqramla davam etdirildi.
Bölmənin digər xəbərləri
