Bakı, 19 dekabr (AZƏRTAC). Dekabrın 19-da M.F.Axundzadə adına Azərbaycan Milli Kitabxanasında Azərbaycan Milli Kulinariya Assosiasiyasının prezidenti, UNESCO-nun Ənənəvi Qida Komitəsinin sədri Tahir Əmiraslanovun ”Söz mətbəxi” kitabının təqdimatı keçirilmişdir.

AZƏRTAC xəbər verir ki, Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyinin direktoru, Milli Məclisin deputatı, AMEA-nın müxbir üzvü Rafael Hüseynov kitaba böyük əhəmiyyət daşıdığını söyləmişdir.

Bildirilmişdir ki, kitab Azərbaycan estetik düşüncəsinin həyatda təsdiqi, xalqımızın yazı mədəniyyətində əlamətdar hadisədir. “Söz mətbəxi“ kitabını Azərbaycan mətbəxi haqqında elmi-tədqiqat əsəri adlandıran natiq müəllifin mətbəxşünaslığı bir elm kimi ortaya qoyduğunu söyləmişdir. Azərbaycan yeməklərinin poetikası adlandırdığı bu kitabın məziyyətlərindən danışan alim, əsərdə təqdim olunmuş yeməkləri təkcə doymaq, insanın hansısa bir tələbatını ödəmək vasitəsi deyil, ruhun və cismin estetik ehtiyacı kimi dəyərləndirmişdir. Natiq bu dəyərli kitabda təsvir edilmiş mətbəx nümunələrini Xalq Rəssamı Lətif Kərimovun xalça eskizləri, Azərbaycan musiqisinin şah əsəri olan muğamlarımızla müqayisə edərək Qobustan qayalarında əksini tapmış qədim mədəniyyətimizlə üzvü bağlılığının elmi təhlili olduğunu göstərmişdir.

AMEA-nın İnsan Hüquqları üzrə Elmi-Tədqiqat İnstitutunun direktoru, Milli Məclisin deputatı Aytən Mustafayeva Tahir Əmiraslanovun “Söz mətbəxi”, “Qarabağ mətbəxi” və digər kitabları ilə Azərbaycan kulinariyasında öz məktəbini yaratdığını, bu nəşrlərin milli mədəniyyətimizə töhfə olduğunu və bu kitabların rus, ingilis, alman və digər dillərə tərcümə edilməsinin zəruriliyini vurğulamışdır.

Milli Məclisin deputatı Qənirə Paşayeva müəllifin “Söz mətbəxi” kitabı ilə bizim mətbəx nümunələrimizi əlimizdən almaq, heç bir elmi əsaslara söykənməyərək, öz adlarına çıxmaq istəyən bədnam qonşularımıza tutarlı cavabı kimi qiymətləndirmişdir.

Kitabın elmi redaktoru, AMEA-nın Nizami adına Ədəbiyyat İnstitutunun direktor müavini, filologiya üzrə elmlər doktoru, professor Məhərrəm Qasımlı böyük vətənpərvərlik və yüksək peşəkarlıqla yazılmış kitabda müasirliklə tarixilik anlayışının peşəkarcasına sintez edildiyini bildirmişdir. Kitabı mədəniyyətimizdə hadisə kimi qiymətləndirən alim, bu mətbu əsəri təkcə milli kulinariyamızın deyil, ümumilikdə, Azərbaycan mədəniyyətinin, tarixinin, dilçiliyinin, etnoqrafiyasının, şifahi xalq ədəbiyyatının, rəngkarlığının, süfrə mədəniyyətinin çox nadir çalarlarının əks olunduğu tapıntı və uğur adlandırmışdır.

Sonda Tahir Əmiraslanov tədbirin təşkilatçılarına və iştirakçılarına minnətdarlığını bildirmiş, kitabını imzası ilə oxuculara hədiyyə etmişdir.