Sumqayıt: aşağı seçki komissiyalarının üzvləri treninqlərə cəlb olunurlar VİDEO
Sumqayıt, 12 mart, Ətrabə Rzayeva, AZƏRTAC
Aprelin 11-də ölkəmizdə keçiriləcək prezident seçkiləri ilə bağlı Sumqayıt şəhərində də aşağı seçki komissiyaları üzvlərinin maarifləndirilməsi üçün Mərkəzi Seçki Komissiyasının (MSK) təşkil etdiyi treninqlərə start verilib. Azərbaycan Respublikası Prezidentinin 2011-ci il 27 dekabr tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı” əsasında təşkil olunan məşğələlər MSK-nın təlim kurslarında iştirak etmiş trenerlər tərəfindən aparılır.
AZƏRTAC xəbər verir ki, 41 saylı Sumqayıt I seçki dairəsi dairə seçki komissiyasında keçirilən treninqdə komissiyanın sədri Vaqif Məmmədov qarşıdan gələn prezident seçkilərinə hazırlıq işlərindən danışıb.
Aşağı seçki komissiyalarının üzvləri üçün təşkil edilmiş treninqlərdə seçki günü prosedurları ilə bağlı məlumat verilib. Treninqdə seçici siyahıları ilə işin aparılması, bildirişlərin seçicilərə çatdırılması və sair bu kimi istiqamətlərdə müzakirələr aparılıb.
Bildirilib ki, dairədə 43 min 258 seçici qeydiyyatdadır. Artıq 33 məntəqə seçki komissiyası tam tərkibdə formalaşıb və uğurla fəaliyyət göstərir.
Aşağı seçki komissiyasının üzvlərinə MSK tərəfindən hazırlanmış “Seçki günü üçün yaddaş” kitabçası, səsvermənin nəticələri haqqında protokol nümunəsi və bir sıra digər zəruri sənəd nümunələri təqdim olunub.
Həmin gün 43 saylı Sumqayıt III seçki dairəsi dairə seçki komissiyasında keçirilən treninqdə isə bildirilib ki, məntəqədə 43 min 383 seçici qeydiyyatdadır. Seçicilərin 168 nəfəri ilk dəfə səs verəcək gənclərdir. Dairə üzrə 34 məntəqə seçki komissiyası fəaliyyət göstərir.
Treninqlərdə seçki günü prosedurları və müstəsna hallar, səslərin sayılması, yekun protokolun doldurulması və sair barədə ətraflı məlumat verilib.
Bölmənin digər xəbərləri
