İQTİSADİYYAT
Suraxanı rayonunda səyyar görüşlər keçirilmişdir
Bakı, 16 avqust (AZƏRTAC). Avqustun 16-da Suraxanı Rayon İcra Hakimiyyətinin başçısı İlqar Abbasovun sakinlərlə növbəti səyyar görüşləri olmuşdur.
Rayon icra hakimiyyətindən AZƏRTAC-a bildirmişlər ki, növbəti belə görüşlər Zığ qəsəbəsində, Qum Adası bağlar yaşayış sahəsində və Hövsan qəsəbə mədəniyyət evində keçirilmişdir.
Rayon rəhbəri məlumat vermişdir ki, “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” çərçivəsində həyata keçiriləcək Tədbirlər Planı”nda nəzərdə tutulmuş 102 tədbirdən icrasına başlanılan və başa çatdırılan tədbirlər proqramın 89,22 faizini təşkil etmiş, həmin Proqramın “Əlavə Tədbirlər Planı”nda nəzərdə tutulmuş 48 tədbirin isə 22,92 faizinin icrasına başlanılmışdır.
Dövlət Proqramı əsasında rayonda görülməsi nəzərdə tutulmuş işlərin icra vəziyyəti icraçı idarə və təşkilatların rəhbərlərinin iştirakı ilə vaxtaşırı müzakirə edilir, müşavirələr keçirilir, qarşıya çıxan problemlərin həlli yolları müəyyən olunur.
İlqar Abbasov iştirakçıların diqqətinə çatdırmışdır ki, proqramda Zığ qəsəbəsi üzrə, o cümlədən Qum Adası bağlar yaşayış sahəsində bir sıra işlərin görülməsi, su təchizatının və kanalizasiya sisteminin yaxşılaşdırılması, qəsəbədaxili yolların tikintisi və təmiri, Zığ gölünün ətraf ərazilərinin neft tullantılarından təmizlənməsi, müvafiq torpaq işlərinin görülməsi, su mənbələrinin müəyyənləşdirilərək suvarma sisteminin qurulması və ərazinin yaşıllaşdırılması nəzərdə tutulmuşdur. Bu işlərin bir qismi icra olunmuş, digərlərinin üzərində isə iş gedir.
Hövsan qəsəbəsində uşaq poliklinikası, “Südçülük sovxozu” ərazisində həkim məntəqəsi tikilmiş, müasir avadanlıq və inventarla təchiz edilərək əhalinin istifadəsinə verilmişdir. Qəsəbədəki 37 nömrəli uşaq musiqi məktəbi, 196 nömrəli orta məktəb əsaslı təmir olunmuş və məktəb üçün 400 şagird yerlik 20 əlavə sinif otağı, poçt şöbəsi üçün yeni bina tikilmişdir. Həmçinin 280 nömrəli orta məktəb, 163 və 273 nömrəli uşaq bağçaları əsaslı təmir edilmiş, su şəbəkəsinin qurulmasına, 76 nömrəli orta məktəbin, 281 nömrəli orta məktəbin əsaslı təmirinə və 600 şagird yerlik 30 əlavə sinif otağının tikintisinə, 23 nömrəli şəhər poliklinikasının, 126 və 263 nömrəli körpələr evi-uşaq bağçalarının əsaslı təmirinə başlanılmışdır.
Səyyar görüşlərdə xüsusi vurğulanmışdır ki, dövlət proqramlarının uğurla icrası nəticəsində abadlıq-quruculuq, yenidənqurma işlərinin sürətlənməsi, əhaliyə göstərilən sosial xidmətlərin həcminin və keyfiyyətinin yaxşılaşdırılması istiqamətində bir sıra mühüm nailiyyətlər əldə edilmiş, elektrik enerjisi, qaz, istilik, su təchizatı və kanalizasiya xidmətlərinin keyfiyyətinin yüksəldilməsi ilə bağlı çox vacib və əsaslı sosial infrastruktur layihələri həyata keçirilmişdir.
Səyyar görüşlərdə sakinlər onları narahat edən məsələlərlə bağlı müraciətlər etmişlər. Sakinlərin qaldırdıqları məsələlərin həlli istiqamətində rayon rəhbəri tərəfindən əlaqədar qurum və təşkilatların rəhbərlərinə yerindəcə tapşırıqlar verilmiş və onların həlli rayon icra hakimiyyətinin rəhbərliyi tərəfindən nəzarətə götürülmüşdür.
Rayon ərazisində aparılan abadlıq-quruculuq, yenidənqurma işlərinə görə sakinlər dövlət başçısına minnətdarlıqlarını bildirmişlər.