Suriya Liderinin Azərbaycana səfəri: Yeni regional reallıqlar fonunda strateji tərəfdaşlıq - ŞƏRH
Bakı,15 iyul, AZƏRTAC
Suriyanın keçid dövrü Prezidentinin Azərbaycana səfəri ikitərəfli münasibətlərin inkişafı baxımından mühüm əhəmiyyət daşıyır. Bu səfər, ilk növbədə, Azərbaycan-Suriya əlaqələrinin yeni mərhələyə qədəm qoyduğunu göstərir. Vətəndaş müharibəsindən çıxmaqda olan və yenidən qurulan Suriya bu gün yeni siyasi və sosial mərhələ yaşayır. Bu mərhələdə regionda yeni güc balansı formalaşır və Suriya burada öz yerini tapmağa çalışır.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu söyləyib.
Deputat qeyd edib ki, Azərbaycan son beş ildə regionda öz mövqeyini əhəmiyyətli dərəcədə möhkəmləndirərək, beynəlxalq münasibətlər sistemində yeni status qazanıb. Bu isə ölkəmizin həm regional, həm də qlobal miqyasda artan nüfuzunun göstəricisidir.
“2023-cü ildən etibarən Azərbaycanın xarici siyasətində yeni prioritetlər formalaşıb. Yaxın Şərq, Şimali Afrika və Körfəz ölkələri ilə münasibətlərin genişləndirilməsi bu strategiyanın əsas istiqamətlərindəndir. Bu geniş coğrafiyada Suriya açar ölkələrdən biri sayılır. Azərbaycan üçün Suriya ilə münasibətlərin sağlam və qarşılıqlı maraqlara əsaslanan şəkildə qurulması vacibdir. Tarix göstərir ki, keçmişdə, xüsusilə Bəşər Əsədin hakimiyyəti dövründə Suriya ərazisindən Azərbaycana qarşı yönəlmiş bəzi terrorçu elementlər fəaliyyət göstərib, eləcə də erməni lobbisinin təsiri ikitərəfli münasibətlərə mənfi təsir edib. Bu kimi risklərin gələcəkdə təkrarlanmaması üçün əməkdaşlıq açıq, praqmatik və davamlı şəkildə qurulmalıdır”, - deyə deputat vurğulayıb.
Hikmət Babaoğlu bildirib ki, Suriya, eyni zamanda, Azərbaycanın strateji müttəfiqi olan Türkiyə ilə ən uzun quru sərhədə malik ölkələrdən biridir. Bu baxımdan regionda sabitliyin bərpası və iqtisadi-ticari əlaqələrin inkişafı baxımından Bakı-Dəməşq xəttində əməkdaşlığın gücləndirilməsi mühüm önəm daşıyır.
“Unutmayaq ki, Suriya, eyni zamanda, Azərbaycan xalqının tarixi-mədəni arealına daxil olan bir ölkədir. Hələbi Azərbaycan mədəniyyətinin ayrılmaz hissəsi kimi qəbul etməyimiz təsadüfi deyil. Orta əsrlərdə Suriya şəhərlərində azərbaycanmənşəli alimlərin, sənətkarların, filosofların fəaliyyəti bu gün də elmi-mədəni əməkdaşlığın təməlini təşkil edir. Bu baxımdan bu gün baş verən yaxınlaşma həmin zəngin irsin yenidən canlandırılması üçün əhəmiyyətli fürsət yaradır”, – deyə Milli Məclisin deputatı bildirib.
O əlavə edib ki, Suriya Ərəb Respublikasının keçid dövrü Prezidenti Əhməd Əl-Şaraanın Azərbaycana səfəri ölkəsinin yenidən qurulması prosesinə dəstək almaq məqsədi daşıyır: “Suriyada sabitliyin bərpa olunmağa başladığı mərhələdə iqtisadi əməkdaşlıq böyük əhəmiyyət kəsb edir. Bu baxımdan Azərbaycanın qaz, yaşıl enerji və digər sahələrdəki təcrübəsi Suriyaya faydalı ola bilər. Həmçinin yenidənqurma, insan resurslarının hazırlanması və mədəni əlaqələrin inkişafı istiqamətlərində də Azərbaycanın bu ölkəyə dəstəyi açıq şəkildə görünür. Elə bu səbəbdən iki ölkə liderlərinin görüşündə yalnız iqtisadi deyil, eyni zamanda, elmi, mədəni və humanitar məsələlər də müzakirə olunub”.
Sonda Hikmət Babaoğlu vurğulayıb ki, Azərbaycan bu gün beynəlxalq münasibətlər sistemində oyun quran ölkələrdən biridir. Suriyanın Azərbaycana olan marağı da bu statusun təsdiqidir. Bu baxımdan Suriyanın keçid dövrü Prezidentinin ölkəmizə səfəri həm simvolik, həm də praktiki əhəmiyyəti baxımından tarixi hadisə kimi dəyərləndirilməlidir.
Bölmənin digər xəbərləri
