TƏLƏBƏLƏR BEYNƏLXALQ HUMANİTAR HÜQUQ SAHƏSİNDƏ BİLİKLƏRİNİ MİLLİ MÜSABİQƏDƏ YOXLAMIŞLAR
AZƏRTAC xəbər verir ki, Novxanıdakı “AF Hotel Aqua Park” ailəvi-istirahət kompleksində Beynəlxalq Qızıl Xaç Komitəsinin (BQXK) Azərbaycan nümayəndəliyinin Beynəlxalq Humanitar Hüquq (BHH) ilə bağlı keçirdiyi dördüncü milli müsabiqəyə yekun vurulmuşdur.
Aprelin 3-də başlayan müsabiqədə Azərbaycanın 9 universitetini təmsil edən və hər biri üç tələbədən ibarət 12 komanda iştirak etmişdir.
Müsabiqə zamanı iştirakçılara uydurulmuş silahlı münaqişə vəziyyəti təklif edilmiş və onlar bu şəraitdə dövlət rəsmiləri rolunda qərar qəbul etmiş, BQXK-nin nümayəndələri qismində çıxış etmişlər.
Gərgin mübarizə şəraitində keçən yarışın nəticələrinə görə, Azərbaycan Respublikasının Prezidenti yanında Dövlət İdarəçilik Akademiyasının "DİA Yure" komandası birinci yeri tutmuşdur.
Müsabiqənin yerli və xarici ekspertlərdən ibarət münsiflər heyəti BHH ilə bağlı biliklərini və müvafiq şəraitdə nəticə çıxarmaq bacarıqlarını göstərən qalib komandaya və ən yaxşı natiqə (Azərbaycan Dillər Universitetinin tələbəsi) mükafatlar təqdim etmişdir.
BQXK 1995-ci ildən etibarən Azərbaycan universitetlərində BHH-nı təbliğ edən proqram həyata keçirir. BQXK BHH üzrə bu cür müsabiqələri 2004, 2005 və 2006-cı illərdə keçirmişdir. Bu gün, BHH beynəlxalq hüquq fakültələrinin tədris proqramına daxil edilmişdir və Azərbaycanın bir neçə universitetinin beynəlxalq münasibətlər və hüquq fakültələrində tədris olunur.
Bölmənin digər xəbərləri
