Tərəvəzçilik Elmi-Tədqiqat İnstitutunda elmi-praktik konfrans keçirilib
Bakı, 30 mart, AZƏRTAC
Tərəvəzçilik Elmi-Tədqiqat İnstitutunda “Aqrar sahə müasir yeniliklərin bir addımında” mövzusunda elmi-praktik konfrans keçirilib.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a verilən məlumata görə, institutun direktoru Elmar Allahverdiyev konfransı açaraq bildirib ki, Azərbaycan dövlətinin qayğısı və dəstəyi nəticəsində Tərəvəzçilik Elmi-Tədqiqat İnstitutu üçün bütün şəraiti olan inzibati bina tikilib və istifadəyə verilib. İnzibati binada alim və mütəxəssislərin işləməsi üçün müasir texniki avadanlıqlarla təchiz olunmuş laboratoriyalar var.
Tədbirdə çıxış edənlər hazırda aqrar sahədə innovasiyaların tətbiqinin son dərəcə vacib və önəmli olduğunu vurğulayıblar.
Tərəvəzçilik Elmi-Tədqiqat İnstitutunun Biotexnologiya laboratoriyasının müdiri Şaban Maqsudov “Biotexnologiya üsullarından istifadə etməklə kartof bitkilərindən sağlam əkin materialının alınması” mövzusunda təqdimatla çıxış edib. O, bu üsulun tətbiqinin respublikamızın sağlam kartof toxumuna olan ehtiyacının ödənilməsində böyük əhəmiyyətə malik olduğunu qeyd edib.
Daha sonra konfrans iştirakçıları institutun ərazisində inşa edilmiş böyük istixana kompleksi ilə tanış olublar.
Bölmənin digər xəbərləri
