Texasda baş vermiş iki partlayış nəticəsində bir nəfər həlak olub
Vaşinqton, 12 mart, AZƏRTAC
Martın 12-də Texas ştatının Ostin şəhərində iki partlayış hadisəsi baş verib.
AZƏRTAC xəbər verir ki, Ostin polisinin məlumatına görə, birinci partlayış şəhərin şimal-şərq hissəsində qeydə alınıb. Partlayıcı maddə evin artırmasına qoyulmuş zərfdə gizlədilib. Zərfin poçt xidməti tərəfindən gətirildiyini zənn edən ev sakinləri onu açdıqdan sonra bomba partlayıb. Yerli vaxtla səhər saat 6:44-də baş vermiş bu partlayış nəticəsində bir yeniyetmə həlak olub, qırx yaşlı qadın isə yaralanıb.
Digər evdə baş vermiş partlayış nəticəsində daha bir qadın xəsarət alıb. Hüquq mühafizə orqanlarının nümayəndələri əhaliyə xəbərdarlıq ediblər ki, gözləmədikləri hər hansı zərf aldıqları zaman onu açmasınlar və dərhal Ostin polis şöbəsinə zəng etsinlər.
Analoji insident martın 2-də baş vermişdi. Entoni Stefan Haus adlı vətəndaş naməlum zərfi açdıqdan sonra ağır yaralanmış və aldığı yaralardan yerli xəstəxanada vəfat etmişdi.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
