Tibb Universitetində yeni əczaçılıq laboratoriyası açılıb
Bakı, 19 noyabr, AZƏRTAC
Akademik Əhliman Əmiraslanov Azərbaycan Tibb Universitetinin (ATU) əczaçılıq fakültəsinin binasında yeni yaradılan müasir elmi tədqiqat laboratoriyasına baxış keçirib.
Bu barədə AZƏRTAC-a ATU-nun mətbuat xidmətindən məlumat verilib.
Müasir avadanlıqlar "Respublikanın təbii sərvətləri əsasında yeni dərman vasitələrinin hazırlanması üçün əczaçılıq üzrə müasir elmi tədqiqat laboratoriyasının təşkili" üzrə layihə çərçivəsində əldə edilib. Layihə Azərbaycan Prezidentinin yanında Elmin İnkişafı Fondu tərəfindən dəstəklənib. Layihənin əsas məqsədi respublikanın təbii sərvətlərindən istifadə etməklə yeni dərman preparatlarının yaradılması üçün müvafiq əczaçılıq laboratoriyasının yaradılmasıdır.
Layihə bir neçə mərhələdə icra ediləcək və onlara müvafiq olaraq laboratoriyada ayrı-ayrı şöbələr yaradılacaq. İlkin mərhələdə bioloji fəal maddələrin əldə edilməsi üzrə şöbə yaradılacaq. Bu şöbədə bitki, heyvan xammallarından bioloji fəal maddələrin alınması üçün istifadə ediləcək. Əczaçılıq texnologiyası şöbəsində isə fitokimyəvi laboratoriyada əldə edilmiş bioloji maddə əsasında müxtəlif dərman preparatlarının hazırlanması üçün istifadə olunacaq. Bura müxtəlif dərman formullarını hazırlamaq üçün avadanlıqlarla təmin ediləcək. Məsələn, burada həb düzəltmək üçün press, kapsulyator, nanoemulsiya avandanlığı və digər köməkçi avadanlıqlar olacaq. Üçüncü standartlaşma şöbəsində isə bioloji fəal maddələrin, substansiyaların və dərman formasına salınmış məhsulların keyfiyyətinə nəzarət üsulları hazırlanacaq. Burada həm substansiya, həm xammalların, həm dərmanların istehsalı və satışında keyfiyyəti müasir formada, ən yüksək səviyyəli avadanlıqla yoxlanılacaq. Bu şöbədə maye xronoqraf, qaz xronoqrafı, infraqırmızı spektr cihazı və digər köməkçi avadanlıqlar olacaq.
Ümumilikdə əczaçılıq fakültəsinin laboratoriyalarına elmi tədqiqatları aparmaq üçün təxminən 30-a qədər müasir avadanlıq alınıb və onlar qısa müddətdə quraşdırılaraq istifadəyə veriləcək. Alınan ən son model cihazların 90 faizi Azərbaycanda digər müəssisələrdə olmayan avadanlıqlardır.
Bölmənin digər xəbərləri
