Tibbi müayinə tədbirləri çərçivəsində Ceyranbatan həkim məntəqəsində əhaliyə müxtəlif xəstəliklər barədə məlumat verilib
Bakı, 12 mart, AZƏRTAC
Səhiyyə müəssisələrində əhalinin tibbi müayinəsi tədbirləri Abşeron rayonunda uğurla həyata keçirilir. Burada müayinələr xəstəxana ilə yanaşı birbaşa yerlərdə, ambulator məntəqələrdə də aparılır.
Səhiyyə Nazirliyinin mətbuat xidmətindən AZƏRTAC-a verilən məlumata görə, rayonda növbəti tədbir Ceyranbatan həkimi məntəqəsində keçirilib. Qastroenteroloq Ülviyyə Quliyeva “helicobacter pylori” infeksiyasının qastritə səbəb olması, oftalmoloq Vüsalə Ələkbərova diabetik retinopatiya və quru göz sindromu barədə, həkim-laborant Şəfa Süleymanova laborator müayinələrin əsası və vacibliyi haqqında sakinlərə ətraflı məlumat veriblər.
Qeyd olunub ki, “helicobacter pylori” infeksiyası bəzən fərqinə varmadığımız qastritdən başlamış mədə xərçənginə qədər müxtəlif xəstəliklərə səbəb ola bilər. İnfeksiyaya yoluxma əsasən hava-damcı vasitəsilə baş verir və onun müşahidə edildiyi xəstələrdə köpmə, mədədə qida qəbulundan sonra ağırlıq hissi, gəyirmə, bəzən isə gecə ağrıları baş verir. Müayinələr nəticəsində aşkar edilib ki, infeksiyanın vaxtında aşkar olunması və müalicəsi mədə xərçənginin qarşısını alır. ABŞ alimlərinin çoxsaylı tədqiqatlarına əsasən sarıkökün tərkibində olan kurkumin maddəsi həmin infeksiyaya qarşı müsbət təsir göstərir. Müasir üsullarla “helicobacter pylori” qanda, əsasən nəfəs testi, nəcisdə isə antigen vasitəsilə müayinə olunur.
Bölmənin digər xəbərləri
