Türkiyə ərazisində əlverişsiz hava şəraiti davam edir
İstanbul, 15 yanvar, AZƏRTAC
Türkiyə ərazisində davam edən qeyri-sabit hava şəraiti müxtəlif bölgələrdə fəsadlar törədir.
AZƏRTAC xəbər verir ki, ölkə ərazisində güclü külək və leysan yağışlar bir sıra problemlər yaradıb. Belə ki, Adananın Karataş bölgəsində Seyhan çayının daşması Adana-Tuzla-Tarsus-Mersin avtomobil yolunun bağlanmasına səbəb olub. Bir çox əkin sahələri daşqından zərər çəkib.
Muğla bölgəsində sürəti saatda 70 kilometrə çatan külək qeydə alınıb. Dənizdə yaranan iri dalğalar limandakı kiçik gəmilərə təsirsiz ötüşməyib. 18 metr uzunluğu olan “Benek” adlı gəzinti gəmisi dəniz sularının altında qalıb.
Axşam saatlarında ölkə ərazisində küləyin sürətinin azalacağı gözlənilir.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
