TÜRKİYƏ PREZİDENTİ ABDULLAH GÜLÜN NİTQİNDƏ AZƏRBAYCANIN TƏBİİ QAZININ AVROPAYA NƏQLİ ƏSAS YER TUTMUŞDUR
AZƏRTAC-ın xüsusi müxbiri xəbər verir ki, Azərbaycan nefti və təbii qazının Türkiyə ərazisindən Avropaya nəqli məsələləri Prezident Abdullah Gülün Makedoniyada keçirilmiş Mərkəzi Avropa ölkələri dövlət başçılarının 15-ci Zirvə görüşündəki nitqinin ana xəttini təşkil etmişdir.
Enerji marşrutlarının diversifikasiyası və Avropanın enerji təhlükəsizliyinin gücləndirilməsinin rəsmi Ankaranın enerji siyasətinin əsas istiqamətləri olduğunu diqqətə çatdıran Abdullah Gül əlavə etmişdir ki, bu məqsədlərə nail olmaq üçün ilk növbədə regional əməkdaşlığı möhkəmləndirmək lazımdır. Azərbaycan təbii qazını Avropaya çatdıran Türkiyə-Yunanıstan-İtaliya boru xətti və Nabukko layihəsi ölkələr arasında əlaqələrə də öz töhfəsini verəcəkdir.
Türkiyə Prezidenti bildirmişdir ki, onun ölkəsi Nabukko layihəsində əsas söz sahiblərindən biri kimi bu layihənin uğurla həyata keçiriləcəyinə əmindir. Azərbaycan təbii qazı ilə yanaşı, gələcəkdə bu kəmər vasitəsilə Türkmənistan, Misir təbii qazı da nəql ediləcəkdir. Ankara İraq qazının da hasilatı və nəqlində fəal iştirak etməkdə maraqlıdır.
Bölmənin digər xəbərləri
