UĞURLU QASTROL SƏFƏRİ
AZƏRTAC xəbər verir ki, Hüseyn Ərəblinski adına Sumqayıt Dövlət Musiqili Dram Teatrı kollektivinin Naxçıvana qastrol səfəri başa çatmışdır. Muxtar respublikanın mədəniyyət və turizm nazirinin dəvəti ilə qastrola gəlmiş kollektiv tanınmış dramaturq Aqşin Babayevin “Xilaskar” əsəri əsasında səhnələşdirilmiş tamaşanı təqdim etmişdir. Xalqımızın ümummilli lideri Heydər Əliyevin siyasi hakimiyyətə qayıtdığı mürəkkəb dövrü əks etdirən sənədli-publisistik pyesə teatrın baş rejissoru, əməkdar artist Firudin Məhərrəmov quruluş vermişdir. Tamaşa Milli Qurtuluş günü münasibətilə nümayiş etdirilmişdir.
Tamaşaçılar ötən əsrin 90-cı illərinin sonlarında ölkəmizdə yaranmış həyəcanlı vəziyyəti, ictimai əhval-ruhiyyəni çox təbii əks etdirmiş aktyorların oyununu hərarətlə alqışlamışlar. Azərbaycan xalqının böyük oğlu Heydər Əliyevin obrazını ölkəmizdə ilk dəfə səhnədə teatrın aktyoru Namis Şirməmmədov canlandırmışdır.
Naxçıvan MR Ali Şurasının sədri Vasif Talıbov tamaşaya baxmış, teatrın truppasına fəxri fərman təqdim etmişdir.
Bölmənin digər xəbərləri
