Ukrayna Azərbaycanlıları Radasının ötənilki hesabatı dinlənilib
Bakı, 15 fevral, AZƏRTAC
Ukrayna Azərbaycanlıları Radasının onlayn formatda növbəti hesabat-seçki konfransı keçirilib.
Qurumdan AZƏRTAC-a bildiriblər ki, konfransa qonaq qismində Azərbaycan Respublikası Diasporla iş üzrə Dövlət Komitəsinin sədri Fuad Muradov və qurumun digər məsul şəxsləri qatılıblar.
Hesabat seçki konfransında Ukrayna Azərbaycanlıları Radasının icraçı direktorunun ötən dövr ərzində görülən işlərlə bağlı hesabatı dinlənilib.
Daha sonra Ukrayna Azərbaycanlıları Radasının idarə heyətinin müxtəlif regionlarda fəaliyyət göstərən nümayəndələri Rusiya-Ukrayna hərbi münaqişəsi fonunda Azərbaycan diasporunun fəaliyyəti barədə məlumat verib.
Konfransda səlahiyyət müddəti bitən icraçı direktor və aparat rəhbəri vəzifələrinə yeni seçkilər keçirilib.
Ukrayna Azərbaycanlıları Birləşmiş Diasporunun sədr müavini, Ukrayna Kikboksinq Federasiyasının vitse-prezidenti Elşad İbrahimov Ukrayna Azərbaycanlıları Radasının yeni icraçı direktoru, Sərxan Vidadiyev isə Radanın Aparat rəhbəri vəzifəsinə seçilib.
Daha sonra cari məsələlər müzakirə olunub.
Diaspor fəallarının müharibə şəraitində olan Ukraynanın ictimai-siyasi həyatında fəallıq göstərmələri tövsiyə edilib.
Bölmənin digər xəbərləri
