UKRAYNA DÜNYA TİCARƏT TƏŞKİLATININ ÜZVÜ OLMUŞDUR
AZƏRTAC-ın xüsusi müxbiri xəbər verir ki, Ukrayna mayın 16-da Dünya Ticarət Təşkilatına (DTT) üzv qəbul edilmişdir. Beləliklə, Ukrayna həmin qurumun 152-ci tamhüquqlu üzvü olmuşdur.
Ukrayna DTT-yə daxil olduğu andan qurumun üzvü olan bütün ölkələrin ticarət məkanında geniş dəstək rejiminə keçir, yəni onun dünya ticarətinin 95 faizdən çoxuna nəzarət edən 151 ölkə ilə ticarət şərtləri eyni vaxtda yaxşılaşır; Ukrayna mallarının DTT-nin üzvü olan ölkələrin əmtəə bazarına çıxarılmasına tarif və qeyri-tarif məhdudiyyətləri azaldılır; Dünya Ticarət Təşkilatında ticarət mübahisələrinə baxılması proseduruna əsasən, ukraynalı istehsalçıların mənafelərinin müdafiəsi imkanları artır; Ukrayna Aİ və digər qurumlarla azad ticarət zonasının yaradılmasına dair danışıqlar prosesində rəsmi status alır.
DTT-yə üzvlüyün Ukrayna iqtisadiyyatının metallurgiya və kimya sahələri üçün daha faydalı olacağı gözlənilir.
Bundan əlavə, həm ərzaq, həm də sənaye mallarının idxal rüsumları tariflərində dəyişikliklər də gözlənilir.
Bölmənin digər xəbərləri
