Ukraynada “sükut günü”ndə 160-a yaxın seçki pozuntusu qeydə alınıb
Kiyev, 31 mart, AZƏRTAC
Ukraynada martın 31-də keçiriləcək prezident seçkiləri ərəfəsində elan edilən "sükut günü"ndə seçki qanunvericiliyinin pozulması ilə bağlı polisə 159 müraciət daxil olub. AZƏRTAC xəbər verir ki, bu barədə Ukrayna Daxili İşlər Nazirliyinin mətbuat xidməti məlumat yayıb.
Məlumata görə, 79 fakt qanunsuz seçki təbliğatı, 8-i seçicilərin ələ alınması, 2-si xuliqanlıq, 70 fakt isə digər qanun pozuntuları ilə bağlı olub.
Ümumiyyətlə, seçki kampaniyası dövründə seçki qanunvericiliyinin tələblərinin pozulması ilə bağlı 4891 iş qeydə alınıb.
Ukraynada seçki məntəqələrinin təhlükəsizliyi üçün 39 min polis cəlb olunub.
Qeyd edək ki, Ukraynada prezident seçkiləri ilə bağlı təbliğat-təşviqat kampaniyası rəsmən 2018-ci il dekabrın 31-də başlanılıb. Ukrayna Mərkəzi Seçki Komissiyası seçkilərə 44 namizədi qeydə alsa da, sonradan onlardan 5 nəfəri martın 7-dək könüllü olaraq seçkilərə qatılmaqdan imtina edib. Beləliklə, bülletenlərə 39 namizədin adı salınıb.
Emil Hüseynli
AZƏRTAC-ın xüsusi müxbiri
Bölmənin digər xəbərləri
