Ulu Öndərin anadan olmasının 95-ci ildönümü Qarabağ bölgəsində təntənə ilə qeyd olunub
Ağcabədi, 10 may, Tahir Ağaməmmədov, AZƏRTAC
Xalqımızın ümummilli lideri, böyük siyasi xadim Heydər Əliyevin anadan olmasının 95-ci ildönümü respublikamızın hər yerində olduğu kimi, Qarabağ bölgəsində də təntənə ilə qeyd edilib.
AZƏRTAC-ın bölgə müxbiri xəbər verir ki, dahi rəhbərin anadan olmasının ildönümü münasibətilə müxtəlif tədbirlər, sərgilər və konsert proqramları keçirilib.
Ağcabədi rayon ictimaiyyəti, əmək kollektivləri, N saylı hərbi hissənin əsgər və zabitləri şəhərin mərkəzi meydanında ulu öndər Heydər Əliyevin abidəsi önünə tər çiçək dəstələri qoyub, dahi rəhbərə öz sevgi və məhəbbətlərini bildiriblər.
Rayon icra hakimiyyətinin başçısı Şahin Məmmədov çıxış edərək, ulu öndər Heydər Əliyevin zəngin fəaliyyətindən, Azərbaycan xalqının bu günü və xoşbəxt gələcəyi naminə misilsiz xidmətlərindən danışıb. Bildirib ki, bütün həyatını Azərbaycan xalqının xoşbəxt gələcəyinə həsr etmiş Heydər Əliyev fenomenal yaddaşı, yüksək təşkilatçılıq bacarığı, tükənməz enerjisi və zəhmətsevərliyi, cəsarəti, qətiyyəti və polad iradəsi, eyni zamanda, insanpərvərliyi və qayğıkeşliyi ilə insanların dərin rəğbətini və sevgisini qazanıb. Ulu Öndərin müdrik və məqsədyönlü siyasəti nəticəsində ölkəmizdə ictimai-siyasi sabitlik bərqərar olub, hüquqi, demokratik dövlət quruculuğu, Milli Ordunun formalaşması, Azərbaycanın beynəlxalq aləmdə demokratik imicinin yüksəlməsi istiqamətində önəmli addımlar atılıb.
Məktəblilərin əl işlərindən ibarət sərgi tədbir iştirakçılarının marağına səbəb olub. Tədbir rəngarəng konsert proqramı ilə axşam saatlarınadək davam edib. Meydana toplaşanlar konsertdən sonra son illər inkişaf edən, gözəlləşən, yeni görkəm alan Ağcabədi şəhərinin səmasını al-əlvan rənglərə boyayan bayram atəşfəşanlığını seyr ediblər.
X X X
Mayın 10-da Ağdam rayon sakinləri Ümummilli Liderin Quzanlı qəsəbəsindəki abidəsini ziyarət edərək, önünə gül dəstələri düzüblər. Mərasimdə rayon icra hakimiyyətinin və Fövqəladə Hallar Nazirliyinin əməkdaşları, Yeni Azərbaycan Partiyası rayon təşkilatının fəalları, hərbçilər, əmək kollektivləri, ziyalılar, ağsaqqallar, veteranlar, gənclər, rayon ictimaiyyətinin nümayəndələri iştirak ediblər.
Ağdam Dövlət Dram Teatrında keçirilən tədbirdə çıxış edənlər ulu öndər Heydər Əliyevin həyat və fəaliyyətinin müəyyən məqamlarından bəhs edib, dahi rəhbərin xilaskarlıq missiyasından, Azərbaycanın müstəqilliyinin bərpası və möhkəmləndirilməsindəki xidmətlərindən danışıblar. Bildirilib ki, Azərbaycan tarixinin yetişdirdiyi ən parlaq simalardan biri, türk dünyasının qüdrətli şəxsiyyətlərindən olan ulu öndər Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb.
Tədbir konsert proqramı ilə başa çatıb.
X X X
Ulu öndər Heydər Əliyevin anadan olmasının 95-ci ildönümü Yevlaxda silsilə tədbirlərlə qeyd edilib.
Mayın 10-da yevlaxlılar Ulu Öndərin xatirəsinə ucaldılmış abidə kompleksini ziyarət edərək, önünə tər gül-çiçək dəstələri düzüb, dahi rəhbərə hörmət və ehtıramlarını bildiriblər.
Tədbir Heydər Əliyev Mərkəzində davam etdirilib. İştirakçılar Mərkəzdə Ulu Öndərin həyat və fəaliyyətini əks etdirən eksponatlarla tanış olub, sənədli filmə baxıblar.
Yevlax Şəhər İcra Hakimiyyətinin başçısı Qoca Səmədov tədbirdə çıxış edərək bildirib ki, Heydər Əliyev siyasətinin dərindən öyrənilməsi və gələcək nəsillərə çatdırılması hər bir azərbaycanlının borcudur. Çünki sağlam gənclik yalnız sağlam siyasi əqidə və uğurlu yolla inkişaf edə bilər.
Yeni Azərbaycan Partiyası Yevlax şəhər təşkilatının və təhsil şöbəsinin məktəblilər arasında birgə keçirdiyi inşa yazı müsabiqəsinin qaliblərinə fəxri fərman və hədiyyələr təqdim olunub.
X X X
Ulu öndər Heydər Əliyevin anadan olmasının 95-ci ildönümü münasibətilə Horadiz şəhərində keçirilən ümumrayon tədbirində minlərlə insan iştirak edib.
Füzuli rayon rəhbərliyi, idarə, müəssisə və təşkilatların kollektivləri, ağsaqqallar, gənclər, Qarabağ müharibəsi veteranları, əsgər və zabitlər əvvəlcə dahi rəhbər Heydər Əliyevin abidəsi önünə tər çiçəklər düzüb, sonra Ulu Öndərə həsr olunan kitab sərgisi və əl işləri ilə tanış olublar.
Rayon icra hakimiyyətinin başçısı Alı Alıyev çıxış edərək ümummilli lider Heydər Əliyevin mənalı ömür yolundan, xalqımız qarşısındakı tarixi xidmətlərindən, dahi rəhbərin müəyyənləşdirdiyi iqtisadi-siyasi xəttin Prezident İlham Əliyev tərəfindən uğurla davam etdirilməsi sayəsində ölkəmizdə qazanılan nailiyyətlərdən danışıb.
Tədbir rəngarəng konsert proqramı ilə başa çatıb.
Bölmənin digər xəbərləri
