İDMAN
Velosiped idmanının şose növü üzrə Açıq Bakı Kriterium yarışının ikinci mərhələsi start götürüb
Bakı, 17 iyul (AZƏRTAC). İyulun 17-də Veloparkda velosiped idmanının şose növü üzrə Açıq Bakı Kriterium yarışının ikinci mərhələsi start götürüb.
Azərbaycan Velosiped İdmanı Federasiyasından AZƏRTAC-a bildiriblər ki, ilk mərhələsi bu ilin martında keçirilən yarışın birinci günündə elit, U-23 və gənclər kateqoriyasında mübarizə aparan 25 velosipedçi iştirak edib.
Reqlamentə əsasən, idmançılar Velopark ərazisində hər biri 1500 metrdən ibarət 16 dövrə vurublar. Yarışda 24 kilometr məsafəni hamıdan tez 8 saylı İxtisaslaşdırılmış Olimpiya Ehtiyatları Uşaq Gənclər İdman Məktəbinin nümayəndəsi, bu günlərdə İsveçrədə keçirilən Avropa çempionatında 12-ci yer tutan Elgün Əlizadə qət edib. Onun komanda yoldaşı Kənan Qəhrəmanlı ikinci nəticə göstərib. İlk üçlüyü Respublika Olimpiya Ehtiyatları İxtisaslaşdırılmış Uşaq-Gənclər Velosiped İdmanı Məktəbinin yetirməsi Ayxan İltifatlı tamamlayıb.
Qaliblər Azərbaycan Velosiped İdmanı Federasiyası tərəfindən medal, diplom və pul mükafatı ilə təltif ediliblər.
İki mərhələdən sonra Kriterium yarışlarının ümumi sıralanmasına Elgün Əlizadə başçılıq edir.
Qeyd edək ki, E.Əlizadə martda keçirilən birinci mərhələnin qalibi olmuşdu. İyulun 18-də 15 və 17 yaşadək velosipedçlər mübarizə aparacaq.