VƏNDAM BƏLƏDİYYƏSİ YERLİ ƏHƏMİYYƏTLİ MƏSƏLƏLƏRİN HƏLLİ İSTİQAMƏTİNDƏ TƏDBİRLƏR GÖRÜR
AZƏRTAC xəbər verir ki, şəhər, qəsəbə və kənd bələdiyyələri milli assosiasiyalarının irəli sürdüyü “Bir bələdiyyəyə azı bir layihə” təşəbbüsünə qoşulan Qəbələnin Vəndam bələdiyyəsi cari ildə bir sıra tədbirlər həyata keçirmişdir.
Bələdiyyənin təşəbbüsü və maliyyə dəstəyi ilə Dəstəmaz çayı üzərində uzunluğu 24 metr, eni 4 metr olan üçaşırımlı körpü tikilib istifadəyə verilmişdir. Həmçinin Vəndam qəsəbəsinin Cizvə yaşayış məntəqəsinə 4,5 kilometr uzunluğunda içməli su xətti çəkilmişdir. Qəsəbənin yeni salınmış yaşayış məntəqələrinə ümumi uzunluğu 1.200 metr olan yol çəkilmişdir.
Bundan əlavə, 2008-ci ilin 5 ayı ərzində Vəndam bələdiyyəsi şəhid ailələrinə, Qarabağ müharibəsi əlillərinə 1000 manat yardım vermişdir. Qəsəbədə 3 orta ümumtəhsil məktəbi fəaliyyət göstərir və bələdiyyə onların təmirinə, istedadlı şagirdlərə təqaüdlərin verilməsinə kömək göstərir.
Həmçinin bələdiyyənin vəsaiti hesabına bu günlərdə Vəndamın Cizvə və Rüzkan yaşayış məntəqələrində ibtidai məktəb binalarının tikintisinə başlanılmışdır. Hər biri 4 sinif otağından ibarət olacaq məktəb binalarının yeni dərs ilində istifadəyə verilməsi nəzərdə tutulur. Yaxın günlərdə qəsəbənin Rüzkan yaşayış məntəqəsinə içməli su xəttinin çəkilməsinə başlanılması planlaşdırılır. Vəndamın təbii qazla təmin olunması üçün isə artıq layihə-smeta sənədləri hazırlanmışdır.
Qəbələnin ən qədim və böyük yaşayış məntəqələrindən biri olan Vəndamda turizmin inkişafı üçün əlverişli şərait mövcuddur. Gözəl təbiəti olan Vəndam qəsəbəsində son illər müasir standartlara uyğun turizm obyektlərinin istifadəyə verilməsi nəticəsində istirahət üçün buraya gələnlərin sayı xeyli artmışdır. Hazırda qəsəbədə “Duyma”, “Yeddi gözəl”, “Cizvə”, “Vəndam”, “Selbasar” və “Əlincə” istirahət mərkəzləri fəaliyyət göstərir.
