İDMAN
Verlyayn “Kampos”dan Formula 1-ə dəvəti nəzərdən keçirməyə hazırdır
Bakı, 22 oktyabr, AZƏRTAC
Formula 1-in sabiq pilotu Paskal Verlyayn bildirib ki, o, 2021-ci ildə yeni komanda ilə Formula 1-ə qayıtmaq imkanını nəzərdən keçirməyə hazırdır. AZƏRTAC xəbər verir ki, daha əvvəl mətbuat Adrian Kamposun rəhbərliyi ilə Monakoda komanda yaradılması ehtimalı barədə yazıb.
“Autosport” Paskal Verlyaynın bu sözlərini sitat gətirib: “Əlbəttə, mən Adrian Kamposla tanışam. O, uzun illər “Mahindra”nın heyətində olub. Mən monakolu uşaqlarla tanışam. Onlar mənim menecmentimlə məşğul olurlar. 2021-ci ildə nə olacağını bilmirəm. Mən təkliflərə açığam. Aydın məsələdir ki, bu fürsətdən istifadə etmək mənim üçün xoş olardı.
2021-ci il mövsümü barədə düşünmürəm. Biz hələ heç 2020-ci il mövsümünə başlamamışıq. Hazırda bunun üzərində işləyirəm. Sonrasına baxarıq. Mən Formula E-də çıxışlardan razıyam.
Formula 1-də iki yaxşı ilim olub. Maraqlı təcrübə idi. Lakin bunu yürüşdəki qələbə hissi ilə müqayisə etmək olmaz. 2017-ci ildə İspaniyada səkkizinci yer və 2016-cı ildə Avstriyada 10-cu yer mənə yürüşlərdə qazandığım emosiyaları vermədi. Odur ki, prioritetləri düzgün qoymaq lazımdır”.