Vyanada İran səfirinin iqamətgahına hücum edən şəxs öldürülüb
Vyana, 12 mart, AZƏRTAC
Martın 11-dən 12-nə keçən gecə İranın Avstriyadakı səfirinin iqamətgahına hücum edən şəxs mühafizəçi əsgərin açdığı atəş nəticəsində həlak olub.
AZƏRTAC xəbər verir ki, gecəyarısı binaya yaxınlaşan 26 yaşlı şəxs əlindəki bıçaqla mühafizəçi əsgərə hücum edib. Əvvəlcə hücum edən şəxsi gözyaşardıcı maddə ilə zərərsizləşdirməyə çalışan hərbçi qolundan aldığı bıçaq yarasından sonra xidməti tapançasından istifadə etmək məcburiyyətində qalıb. Avstriya vətəndaşı olan hücumçu hadisə yerində həlak olub.
Hadisə yerinə polis və Konstitusiyanın Mühafizəsi və Terrora qarşı Mübarizə üzrə İdarənin təhqiqatçıları cəlb olunublar. Əyalət polis idarəsinin rəsmisi Harald Sörös mətbuata verdiyi açıqlamada bildirib ki, hadisənin səbəbi və motivləri barədə hələlik heç bir məlumat yoxdur. İqamətgaha hücum edən şəxsin Vyanadakı mənzilində polis tərəfindən axtarış aparılır.
İranın Vyanadakı diplomatik nümayəndəliyi, eləcə də şəhərdəki digər diplomatik nümayəndəliklərin mühafizəsi gücləndirilib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
