“WorldSkills Azerbaijan” İctimai Birliyi: Veb texnologiyaları üzrə milli yarışa qeydiyyat davam edir
Bakı, 7 may, AZƏRTAC
Peşə Təhsili üzrə Dövlət Agentliyi və “WorldSkills Azerbaijan” İctimai Birliyi ilə birgə əməkdaşlığı çərçivəsində Sənaye və İnnovasiyalar üzrə Bakı Dövlət Peşə Təhsil Mərkəzində Veb texnologiyaları üzrə milli yarış keçiriləcək.
Agentlikdən AZƏRTAC-a bildirilib ki, yarışda iştirak etmək istəyən şəxslər mayın 15-dək müraciət edə bilərlər. Müraciət hüququna 16–21 yaş aralığında olan şəxslər malikdir.
Bu yarış peşə bacarıqlarını nümayiş etdirmək və beynəlxalq səviyyədə Azərbaycanı təmsil etmək istəyən istedadlı gənclər üçün əhəmiyyətli bir platformadır. Qalib şəxsin adı 2026-cı ildə Çinin Şanxay şəhərində keçiriləcək və 85-dən çox ölkənin qatılacağı “WorldSkills Shanghai” yarışında iştirak üçün potensial namizədlər siyahısına daxil edilə bilər.
Xatırladaq ki, “WorldSkills Azerbaijan” platformasının əsası 2020-ci ilin oktyabr ayında Azərbaycanın “WorldSkills International” təşkilatına 85-ci üzv kimi qəbulu ilə qoyulub. Dünyada müxtəlif bacarıq istiqamətləri üzrə olimpiya yarışlarının təşkilatçısı kimi tanınan “WorldSkills” hərəkatı əmək bazarının tələblərinə və qlobal standartlara uyğun peşəkarlar yetişdirmək, həmin standartları təhsil sisteminə inteqrasiya etmək imkanı yaradır.
Bölmənin digər xəbərləri
