XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Avqustun 22-də Azərbaycan Respublikasının xarici işlər naziri Vilayət Quliyev Kanadanın Türkiyədə və Azərbaycanda akkreditə olunmuş Müvəqqəti İşlər Vəkili Styuard Xyusu qəbul etmişdir.
Görüş zamanı nazir Vilayət Quliyev Kanada ilə Azərbaycan arasındakı münasibətlərin möhkəmlənməsi və əlaqələrin bir çox sahələrdə inkişaf etdirilməsini xüsusilə qeyd edərək, əməkdaşlığın bundan sonra da genişlənməsinə ümid etdiyini bildirmişdir.
Daha sonra qonağın xahişi ilə nazir Vilayət Quliyev Azərbaycanda demokratiyanın inkişafı, respublikamızın Qərbə doğru inteqrasiyası, Avropa Şurasına qəbul edildikdən sonra bu beynəlxalq təşkilat qarşısında öhdəliklərin yerinə yetirilməsi sahəsində görülən işlər və avqustun 24-də Konstitutsiyaya edilən dəyişikliklərlə bağlı keçiriləcək ümumxalq referendumu barədə ətraflı məlumat vermişdir.
Ölkəmizin xarici siyasət idarəsinin başçısı Vilayət Quliyev Ermənistan-Azərbaycan, Dağlıq Qarabağ münaqişəsinin həlli istiqamətində aparılan işlər, ATƏT-in Minsk qrupunun bu istiqamətdə fəaliyyəti və qaçqınların ağır vəziyyəti barədə də qonağı məlumatlandırmış, həmçinin münaqişənin beynəlxalq hüququn prinsip və normaları əsasında tezliklə həll edilməsi üçün beynəlxalq birliyin səylərinin zəruriliyini qeyd etmişdir.
Ətraflı məlumatlara görə öz təşəkkürünü bildirən Styuard Xyus dövlətlərimiz arasındakı əlaqələrin və ikitərəfli faydalı əməkdaşlığın inkişaf etdirilməsinə tərəfdar olduğunu söyləmişdir. Ermənistan-Azərbaycan, Dağlıq Qarabağ münaqişəsinə toxunaraq Styuard Xyus erməni separatçı rejimi tərəfindən işğal edilmiş Azərbaycanın Dağlıq Qarabağ bölgəsində keçirilmiş “prezident seçkiləri”nin heç bir beynəlxalq qrum və dövlət tərəfindən tanınmamasını dünya birliyinin Azərbaycana olan inamının təzahürü kimi qiymətləndirmiş və münaqişənin tezliklə ədalətli prinsiplər əsasında həll ediləcəyinə ümidvar olduğunu bildirmişdir.
Sorüşdə qarşılıqlı maraq doğuran bir sıra məsələlər də müzakirə edilmişdir.
Bölmənin digər xəbərləri
