SİYASƏT
XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Avqustun 23-də Azərbaycan Respublikasının xarici işlər naziri Vilayət Quliyev Liviya Ərəb Xalq Sosialist Cəmahiriyyəsinin ölkəmizdəki Xalq bürosunun katibi Nasir Məhəmməd Abdu əl-Səmini qəbul etmişdir.
Cənab Nasir Məhəmməd Abdu əl-Səmi Liviya Cəmahiriyyəsi ilə Azərbaycan arasında münasibətlərin inkişafını vurğulayaraq, ikitərəfli əməkdaşlığın genişlənməsi üçün müştərək iqtisadi komissiyanın tezliklə yaradılmasının vacib olduğunu söyləmişdir.
Diplomat öz dövlətinin Birləşmiş Millətlər Təşkilatı Baş Məclisinin 59-cu sessiyasında bu təşkilatın insan hüquqları komitəsinin üzvlüyünə namizədliyinin irəli sürüləcəyini bildirmişdir. Nasir Məhəmməd Abdu əl-Səmi bu məsələnin Afrika Birliyinin və İslam Konfransı Təşkilatının xarici işlər nazirləri şuralarında dəstəkləndiyini qeyd edərək, Azərbaycanın da Liviya Cəmahiriyyəsinə dəstək verəcəyinə ümid etdiyini vurğulamış və bununla əlaqədar ölkəsinin xarici işlər nazirinin məktubunu nazir Vilayət Quliyevə təqdim etmişdir.
Vilayət Quliyev Liviya Cəmahiriyyəsinin bu təşəbbüsünü yüksək qiymətləndirmiş və məsələnin müsbət həllini tapacağına ümid etdiyini bildirmişdir.
Nazir ölkələrimiz arasındakı əlaqələrin möhkəmlənəcəyinə və əməkdaşlığın bir çox sahələrdə inkişaf edəcəyinə inamını ifadə etmiş və Azərbaycanın da BMT çərçivəsində fəaliyyətinin Liviya tərəfindən dəstəklənəcəyinə ümidvar olduğunu söyləmişdir.
Görüşdə qarşılıqlı maraq doğuran bir sıra məsələlər də müzakirə edilmişdir.
XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Avqustun 23-də Azərbaycan Respublikasının xarici işlər naziri Vilayət Quliyev Pakistan İslam Respublikasının Azərbaycandakı fövqəladə və səlahiyyətli səfiri Faiz Məhəmməd Xosonu qəbul etmişdir.
Görüş zamanı səfir Faiz Məhəmməd Xoso erməni separatçı rejimi tərəfindən işğal edilmiş Azərbaycanın Dağlıq Qarabağ bölgəsində ermənilər tərəfindən keçirilmiş “prezident seçkiləri” ilə əlaqədar Pakistan hökumətinin əvvəlki şifahi mövqeyini ifadə edən məktubu nazir Vilayət Quliyevə təqdim edərək, Pakistan hökumətinin bu seçkiləri qanunsuz hesab etdiyini, beynəlxalq norma və prinsiplərə zidd olduğunu, Azərbaycanın Dağlıq Qarabağ məsələsi ilə bağlı mövqeyini dəstəklədiyini, Azərbaycan Respublikasının suverenliyini və ərazi bütövlüyünü tanıdığını bir daha vurğulamışdır.
Ölkəmizin xarici siyasət idarəsinin başçısı Vilayət Quliyev Pakistanın Azərbaycan Respublikasının müstəqilliyini tanıyan ilk dövlətlərdən biri olduğunu qeyd edərək, ölkələrimiz arasındakı münasibətlərin inkişafına, əlaqələrin bir çox sahələrdə genişlənməsinə xüsusi önəm verdiyini, o cümlədən beynəlxalq təşkilatlar çərçivəsində səmərəli əməkdaşlığın davam etdirilməsinə ümid etdiyini bildirmişdir.
Görüşdə nazir Vilayət Quliyev və səfir Faiz Məhəmməd Xoso bu ilin sentyabr ayının 1-də İslamabadda keçiriləcək Azərbaycan-Pakistan iqtisadi komissiyasının növbəti iclası barədə də bir sıra məsələləri müzakirə etmişlər.