Bakı, 1 fevral (AZƏRTAC). Fevralın 1-də Azərbaycan Respublikası Milli Olimpiya Komitəsinin (MOK) vitse-prezidenti, dünya, Avropa və SSRİ çempionu, Əməkdar İdman Ustası Xəzər İsayevin 50 illik yubileyinə həsr olunmuş “Xəzərin Xəzər dünyası” kitabının təqdimat mərasimi keçirilmişdir.

AZƏRTAC xəbər verir ki, təqdimat mərasimində dünya şöhrətli idmançı Xəzər İsayevin ömür yolundan danışılmışdır.

Bildirilmişdir ki, bir idmançı kimi o, şöhrət tacını başına çox erkən yaşlarında qoymuşdur. !978-ci ildə 16 yaşında ikən ordu sıralarında gənclər və kişilər arasında keçirilən SSRİ birinciliyində qalib adını qazanmış, 1979-cu ildə yeniyetmələr arasında SSRİ birinciliyinin gümüş mükafatçısı, 1980-ci ildə yeniyetmələr arasında SSRİ çempionu, 1985-ci ildə SSRİ kubokunun sahibi olmuşdur. X.İsayev 1986-cı ildə isə idman karyerasında ən yüksək adları - keçmiş SSRİ, dünya və Avropa çempionu adlarını qazanmışdır.

Diqqətə çatdırılmışdır ki, X.İsayev Azərbaycan Olimpiya hərəkatının inkişafında, ölkənin idman həyatında çox önəmli işlər görmüşdür. MOK-un nəzdində Ədalətli Oyunlar Komissiyasının yaradılması da onun təşəbbüsüdür. İdman aləmində qazandığı uğurlara görə 2002-ci ildə ulu öndər Heydər Əliyev tərəfindən “Şöhrət” ordeni ilə təltif edilmişdir. 2007-ci ildə Prezident İlham Əliyev tərəfindən “Əməkdar Bədən Tərbiyəsi və İdman Xadimi” fəxri adına layiq görülmüşdür.

Kitabın müəllifi Minadi Mikayılov bildirmişdir ki, təqdim olunan nəşrin qəhrəmanı, idman aləmində öz xüsusi dəsti-xətti olan Xəzər İsayevin ömür salnaməsini oxuculara çatdırmağı mənəvi borcum hesab etmişəm. Müəllif demişdir ki, kitabın yazılmasında məqsəd X.İsayevin yetişməkdə olan nəslə örnək olacaq həyatını gənclərə çatdırmaqdır.

Digər çıxış edənlər də kitabın ölkəmizdə idmanın inkişaf etdirilməsi və gənc nəslin tərbiyəsi üçün əhəmiyyətli olacağını vurğulamışlar. Bildirilmişdir ki, Azərbaycanın dünyada tanıdılmasında özünəməxsus xidmətləri olan Xəzər İsayev haqqında belə bir kitabın yazılması idman və idmançılara dövlət qayğısının əyani təzahürüdür.

Tədbirdə, həmçinin kitabın məziyyətlərindən söhbət açılmışdır.

Bildirilmişdir ki, “CBS” mətbəəsində nəfis tərtibatla çap edilmiş kitaba mədəniyyət və turizm naziri Əbülfəs Qarayev “Ön söz” yazmışdır. Gənclər və idman naziri Azad Rəhimovun və Dövlət Gömrük Komitəsinin sədri Aydın Əliyevin, Azərbaycanın Olimpiya strukturları rəsmilərinin və Olimpiya çempionlarının təbrikləri də kitabda yer almışdır. Bundan əlavə, kitabda Xalq Şairi Fikrət Qocanın, Xalq Artisti Habil Əliyevin, Bakı Slavyan Universitetinin rektoru Kamal Abdullayevin, AZƏRTAC-ın buraxılış redaktoru Əhməd Məmmədovun və başqalarının ömrünün 51-ci baharına qədəm qoyan idmançı haqqında ürək sözləri toplanmışdır.

Xüsusi qeyd olunmuşdur ki, X.İsayevin uşaqlıq və məktəb illərindən bəhs edən məqalələr onu oxuculara daha yaxşı tanıdacaqdır. Bundan əlavə, kitabda X.İsayevin mötəbər beynəlxalq yarışlarda uğurlarını əks etdirən fotoşəkillər də verilmişdir. Bildirilmişdir ki, kitabın “Qəzetlərdən xülasələr” bölməsi tarixi faktlarla zənginliyi baxımından idman sahəsindən yazanlar üçün mənbə olacaqdır.

Tədbirin sonunda X.İsayev kitabın ərsəyə gəlməsində xidməti olanlara təşəkkür etmişdir. O, demişdir: “ Mənim idman fəaliyyətimə ən yüksək qiyməti dövlətimizin başçısı İlham Əliyev vermişdir. Yanvarın 31-də Azərbaycan Prezidenti məni “Vətənə xidmətlərə görə” ordeni ilə təltif etmişdir. Bu, mənim üçün şərəf və məsuliyyət deməkdir. Dövlətimizin başçısının bu yüksək etimadını öz işimlə doğrultmağa çalışacağam.”