Yeni il ərəfəsində Gəncədə sərnişindaşımada problem olmayacaq
Gəncə, 27 dekabr, Rauf Hacıyev, AZƏRTAC
Yeni il ərəfəsində sərnişinlərin Gəncədən ölkədaxili və xarici səfərlərə rahat gedib-gəlməsi üçün dəmir yolu vağzalı, avtovağzal və hava limanı gücləndirilmiş iş rejimində fəaliyyət göstərəcək. Mövcud reyslər üzrə sərnişin sıxlığı yaşanarsa, xətlərə əlavə nəqliyyat vasitələri buraxılacaq.
AZƏRTAC-ın bölgə müxbiri xəbər verir ki, hazırda Gəncə Beynəlxalq Avtovağzalında reyslər gündəlik cədvəl üzrə həyata keçirilir.
Kassalardan daha çox Gəncə-Bakı istiqamətinə bilet satılır. Əgər qarşıdakı günlərdə sərnişinlərin eyni istiqamət üzrə sıxlığı müşahidə olunarsa, xətlərə əlavə avtobuslar daxil ediləcək.
Gəncə Dəmir yolu Vağzalında da sərnişinlərin mövcud reyslər üzrə hərəkəti tam təmin edilib. Vağzaldan bildirilib ki, bayram günlərində sərnişinlər üçün heç bir problem olmayacaq.
Gəncə Beynəlxalq Hava Limanından isə bildirilib ki, hazırda adi günlərlə müqayisədə nisbətən sərnişin sıxlığı müşahidə olunur. Lakin bu hal daxili və beynəlxalq reyslərdə gecikmələrə səbəb olmur.
Bölmənin digər xəbərləri
