YENİ TAMAŞA UĞURLA KEÇMİŞDİR
Azərbaycanın böyük satirik şairi Mirzə Ələkbər Sabirin “Pisi pis, əyrini əyri, düzü həmvar yazım...” misrasının daşıdığı məna yükü Milli Məclisin deputatı, yazıçı-jurnalist Xeyrəddin Qocanın dekabrın 14-15-də Akademik Dövlət Milli Dram Teatrının səhnəsində tamaşaya qoyulmuş “Hərənin öz payı...” komediyasının əsas ideyasını təşkil edir.
Teatrda AZƏRTAC-ın müxbirinə demişlər ki, müəllif iki hissədən ibarət bu əsərində prezident olmaq istəyən iki partiya başqanının timsalında cəmiyyətimizin müasir həyatındakı eybəcərlikləri - məddaxlığı, yaltaqlığı, ikiüzlülüyü, cahilliyi satiranın gücü ilə ifşa edərək, bir-birindən maraqlı səhnə obrazları yaratmışdır.
Cəlil Məmmədquluzadə, Mirzə Ələkbər Sabir, Əbdürrəhim bəy Haqverdiyev obrazlarının canlandırıldığı səhnələrdə o zamandan indiyədək cəmiyyətimizdə nələrin dəyişildiyi və dəyişilmədiyi, hansı hadisələrin baş verdiyi son dərəcə maraqlı rejissor yozumu ilə öz əksini tapmışdır. Respublikanın xalq artisti rejissor Mərahim Fərzəlibəyov müəllifin kinayə, isteza, ikibaşlı sözlər və zarafatlarla zəngin komediyasının məzmununu səhnədə tam açmağa nail olmuşdur. Tamaşada satirik gülüş nöqsanlara qarşı səfərbəredici qüvvəyə çevrilir.
Komediyanın ilk tamaşaları böyük uğurla keçmiş, tamaşaçılar tərəfindən alqışlarla qarşılanmışdır. Əsas rollarda xalq artistləri Yaşar Nuri, Hacı İsmayılov, Rafiq Əzimov, əməkdar artistlər Telman Əliyev, İlham Namiq Kamal, artistlər Elxan Quliyev, Cəfər Namiq Kamal çıxış etmişlər.
Bölmənin digər xəbərləri
