Bakı, 8 avqust, Aysel Azad, AZƏRTAC

Bu il ölkəmizdə üçüncü “Yüksəliş” müsabiqəsi baş tutdu. Müsabiqədə 13 min 474 iştirakçıdan 109 namizəd finala vəsiqə qazandı və onlardan 22 nəfəri qalib adını qazandı. Qaliblərin 12 nəfəri öncəki müsabiqələrin müxtəlif mərhələlərində iştirak edib. Həmin qaliblərdən Şamxal Cəmilzadə “Yüksəliş” müsabiqəsi ilə bağlı fikirlərini AZƏRTAC-la bölüşüb.

Şamxal Cəmilzadə 1991-ci ildə anadan olub. Almaniyanın Klaustal Texniki Universitetində biznesin idarə edilməsi ixtisası üzrə bakalavriat, Azərbaycan Dövlət İqtisad Universitetində biznesin təşkili və idarə edilməsi ixtisası üzrə magistratura təhsili alıb. ABŞ-ın Massaçusets Texnologiya İnstitutunda inkişaf etməkdə olan ölkələrdə data və iqtisadiyyat ixtisası üzrə ikinci magistratura təhsili alıb. Hazırda İcbari Tibbi Sığorta üzrə Dövlət Agentliyində baş məsləhətçi vəzifəsində çalışır. Həmçinin Azərbaycan Neft və Sənaye Universitetində müəllimdir. Onunla müsahibəni təqdim edirik.

-“Yüksəliş” müsabiqəsində qalibiyyətə gedən yol necə oldu?

- Birinci “Yüksəliş” müsabiqəsində ilk 300-lüyə düşməyi bacarsam da, finala vəsiqə qazana bilməmişdim. O dövrü xatırlayanda həyəcan və emosiyalı olduğumu anlayıram. Əsl lider, əsl idarəçi isə həyəcan və emosiyalarını nəzarət altında saxlamağı, idarə etməyi bacarmalıdır. Ruhdan düşüb təslim olmadım. İkinci “Yüksəliş”də qeydiyyatdan keçdim. Bu dəfə həyəcan və emosiyalara nəzarət etmək bacarıqlarını inkişaf etdirib gəlmişdim. Final mərhələsinə keçmək hüququ qazanan 100 iştirakçıdan biri olmağı bacardım, amma qaliblər siyahısına düşmək mümkün olmadı. Yenə təslim olmadım. Nəticə və davranışlarımı analiz etdim. Daha yaxşı idarəçi olmaq üçün nələri etməliyəm deyə düşündüm, müşahidə, araşdırmalar apardım. Öyrəndiklərimi işimdə tətbiq etməyə başladım. Öyrəndikcə tətbiq etdim, tətbiq etdikcə öyrəndim. Üçüncü dəfə daha inamlı, təcrübəli və təmkinli biri olaraq yenidən yarışmaya qatıldım. Bu dəfə məsələlərə daha fərqli prizmadan yanaşırdım. Oynamırdım. Sadəcə qarşıya qoyulmuş keysin komanda olaraq ən mükəmməl səviyyədə həll edilməsi üçün əlimdən gələn hər şeyi edirdim. Nəhayət, ballar açıqlandı. O hissləri təsəvvür etmək mümkün deyil. 13 min 474 nəfər arasından seçilən 22 qalibdən biri də mən idim. 0,16 faiz ilkin ehtimalı gerçəkləşdirməyi bacarmışdım. İlk baxışdan sadə riyazi hesablamanın qalibiyyət şansını bu qədər qiymətləndirdiyi, qarşılığında isə gün, aylarınızı investisiya etməyi tələb edən yarışmaya bir yox, iki yox, düz üç dəfə müraciət etdim. Əgər qalib olmasam, 4-cü və 5-ci dəfə də müraciətimi təkrarlayardım. Ancaq ehtiyac qalmadı, 3-cü cəhdimdə qalib olmağı bacardım. Çünki bu yarışma sadə riyaziyyata əsaslanan lotereya deyil. Burada qalib olmaq üçün dünyagörüşü, intellektual, analitik, sürətli düşünmə bacarığı, idarəçilik səriştələrinin hər birinə sahib olmaq məcburidir. Bütün bu kompetensiyaların mükəmməl səviyyədə olması sizi yalnız 14 min iştirakçı arasından seçilmiş 300-lüyə - yarımfinal mərhələsinə qədər gəlib çıxmanıza şərait yarada bilər. Qalib olmaq üçün isə mükəmməl idarəçinin sahib olması məcburi olan əlavə 8 kompetensiya üzrə bacarıqlarınızla digərlərindən seçilməyiniz lazımdır. Amma hər şey burada bitmir, əksinə, necə deyərlər, hər bir son yeni bir başlanğıcdır. Qarşıda hələ çox öyrəniləcək biliklər, qazanılmalı təcrübələr, inkişaf etdirilməli bacarıqlar, gediləcək yollar, fəth ediləcək zirvələr var.

- Hər üç “Yüksəliş” müsabiqəsində iştirak etmisiniz. Sizcə, müsabiqələr arasında hansı fərqlər var idi?

- İllər keçdikcə təşkilatçılıq baxımından nəzərəçarpacaq irəliləyişlər hiss olunur. Eləcə də cəmiyyətdə həm yarışma haqqında məlumatlılıq, həm də inam və maraq hər müsabiqədə artır. İştirakçılar isə yarışma formatı haqqında daha məlumatlı olsalar da, qiymətləndirmə alqoritmini hələ tam anlaya bilməyiblər. Fikrimcə, bu, yarışma təşkilatçılarının professionallıqlarının bir başqa göstəricisidir.

- Müsabiqə müddətində daha çox hansı mərhələni bəyəndiniz?

-Ümumiyyətlə, mən hələ məktəb zamanlarından fərqli formatda olan intellektual, bilik və biznes keys tipli yarışmalarda müntəzəm iştirak edərək nailiyyətlər qazanmışam. Lakin “Yüksəliş” sanki onların hər birinin cəmlənmiş, əlavə olaraq da bir sıra digər nüansların, kompetensiyaların əlavə olunduğu unikal bir yarışmadır. Hər bir mərhələ sanki bir ələk rolunu oynayır - mükəmməl bir idarəçinin axtarılmasında istifadə olunan bir sınaq. Ona görə hər bir mərhələnin öz həyəcanı və necə deyərlər, gözəlliyi olur. Lakin final həyəcanı təbii ki, bir başqadır. Əlavə olaraq, idarəçi mentorlarla bir masada müzakirələr aparmaq, hər biri minlərlə iştirakçı arasından seçilmiş digər yarışmaçılarla mübarizə aparmaq, bütün bu nüanslar finalı bir başqa unudulmaz edir.

- Qalib olmağınız hədəflərinizdə, planlarınızda nələrisə dəyişdimi?

-“Yüksəliş” müsabiqəsi üç ildir ki, tətil planlarımda dəyişikliklər etməmə səbəb olub (gülür).

Hədəflərə gəlincə, düşünürəm ki, bu, hələ uşaqlıqda insanın xarakteri ilə birlikdə formalaşır. Fikrimcə, “Yüksəliş” müsabiqəsində qazandığım təcrübə və əlaqələr hədəflərimə gedən yolda pozitiv dəyişikliklərə səbəb olacaqdır.

- Müsabiqəyə qatılmaq istəyənlərə hansı tövsiyəniz var?

-“Yüksəliş” müsabiqəsi elə bir formatdadır ki, buna spesifik hazırlaşmaq effektiv deyil. İştirakçı özünü hərtərəfli inkişaf etdirməlidir. Mərhələlərin hansısa birində kəsilsəniz, bu o deməkdir ki, dövlətimiz, millətimizin ehtiyacı olan idarəçilərin sahib olması zəruri olan həmin bilik, bacarıqlara kifayət qədər yiyələnməmisiniz. Çalışın xüsusilə o sahədə özünüzü inkişaf etdirin. Yarımfinal və final mərhələsinə çatdıqda isə sadəcə qarşıya qoyulmuş keysin komanda olaraq ən mükəmməl səviyyədə həlli üçün əlinizdən gələni etməyə çalışın. Ən əsası, məqsədə ilk dəfəsindən nail olmasanız belə təslim olmayın. Təkrar-təkrar, amma hər dəfə əvvəlkindən daha güclü, daha təmkinli, daha qərarlı olaraq geri dönün.

Bir toplumun yüksəlişi onun fərdlərinin yüksəlişləri cəminə bərabərdir. Vətənimiz, millətimizin yüksəlişi bizimlə davam edəcək. Üçüncü “Yüksəliş” müsabiqəsinin simvollarından birinə çevrilən keyslərin birində hazırladığımız kağız gəmi üzərinə "Şuşa" yazısını mən yazmışdım. Düşüncəmiz, amalımız daim ailə, vətən, millətimiz, dünyəvi ədalət olsun mesajını vermək istəmişdim. Atdığımız hər bir addım, hər bir nailiyyətimiz ailəmiz, vətənimiz, millətimizə xeyirli-uğurlu olsun. Dövlətimiz, millətimizin yüksəlişi bizimlə davam edəcək. Bu yüksəlişdə öz payı olan “Yüksəliş” müsabiqəsinə, hər bir qurum, şirkət və fərdə öz təşəkkürümü bildirirəm.

Xatırladaq ki, “Yüksəliş” müsabiqəsinin qalibini bir il ərzində idarəçi rəhbərlərdən - böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı, kadr ehtiyatı bankına daxiledilmə və 20 min manat dəyərində pul mükafatı gözləyir.

“Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Dövlətimizin başçısı 2022-ci il dekabrın 20-də üçüncü “Yüksəliş” müsabiqəsinin keçirilməsi ilə bağlı Sərəncam imzalayıb.