REGİONLAR
Oğuzda sel təhlükəsinin qarşısı alınır, yaşayış məntəqələri mühafizə olunur VİDEO
Oğuz, 19 mart, AZƏRTAC
Dağ çaylarının keçdiyi Oğuz rayonunda yaşayış məntəqələrini və əkin sahələrini sel sularından qorumaq Oğuz Suvarma Sistemləri İdarəsinin başlıca vəzifələrindən biridir. Hər il Oğuzda mühafizə bəndləri tikilir, təmirə ehtiyacı olan bəndlər isə əsaslı təmir olunur. Mühafizə işləri ilə yanaşı 10653 hektar torpaq sahəsinin də suvarılması idarə tərəfindən həyata keçirilir.
AZƏRTAC-ın bölgə müxbiri xəbər verir ki, Oğuzda rayon ərazisindən beş çay sistemi keçir. Çaylar əsas mənbəyini dağlardan götürür. Əsas qidalanma mənbəyi isə yağış suları və yağan qarın miqdarından ibarətdir. Buna görə də yaz və payız aylarında sellər müşahidə olunur. Belə çaylardan biri də Daşağıl çayıdır. Daşağıl çay sistemində 2020-ci ildə köhnə bənd yeni beton bəndlə əvəz edilib. Bir ədəd 100 poqonmetr uzunluğunda daş beton bənd əsaslı təmir olunub.
Bundan başqa, çay yatağında insanların çoxdankı arzusu olan suqəbuledici qurğu istifadəyə verilib. Ucqarda yerləşən Baş Daşağıl kəndinin zəhmətkeş insanları qurğunun tikildiyi vaxta qədər alternativ üsullardan istifadə etməklə kəndin əkin sahələrini su ilə təmin etməyə çalışsalar da, bu, müvəqqəti olub. Yeni suqəbuledici qurğunun inşasından sonra onların problemi birdəfəlik həllini tapıb. Suqəbuledici qurğunun inşasından sonra kəndə müntəzəm olaraq su verilir. Qurğunun hündürlüyü 5 metr, eni 4 metr, uzunluğu isə 30 metrdir.
Baş Daşağıl kənd sakini Marif Veysəlovla söhbət zamanı deyib: “Dövlətimiz də sağ olsun ki, ucqar kənddə olsaq da, problemlərimizi həll edir. Mən uşaqlığımdan bu kənddə böyümüşəm. Gözümü də açandan elə bu bəndi burada adi üsulla hazırlayırdıq, kənd camaatı yığılırdı, daş tökürdü, təsərrüfata ağac bəndlə su qaldırırdıq. O da az müddətdə ləğv olub gedirdi. Bu gün bəndimiz salınıb, çox şükür ki, həm təsərrüfatımızdan, həm də gələn sel suyundan arxayın evimizdə otura bilirik”.
Rayon ərazisindən axan daha bir çay sistemi Qala çayıdır. Çayın sağ sahilində Filfilli kəndi, sol sahilində isə Xaçmaz kəndi yerləşir. Son illər hər iki kəndin sel sularından mühafizəsi üçün mütəmadi işlər görülür.
Oğuz Suvarma Sistemləri İdarəsinin rəisi Nizami Əhmədov bildirib ki, hər il bu çayda texnikalar vasitəsilə qruntun daşınması, həm də buldozerlərlə təmizləmə işləri aparılır. Çayın sağ və sol sahilində qurulan bəndlərin dolması ilə əlaqədar bəndlərdə təmir və hündürləşmə işləri görülüb. Burada olan üç bənd 3 metr hündürlüyə qaldırılıb. Qarşı tərəfdən isə beton bənd qurulur ki, bu bəndlər öz funksiyalarını yerinə yetirə bilsin.
Mühafizə tədbirləri ilə yanaşı, çaylardan götürülən su suvarma məqsədilə insanlara çatdırılır. Rayonda 10653 hektar suvarılan torpaq sahəsi mövcuddur. Həmin torpaq sahələrində hər il müxtəlif bitkilər əkilir. Bu sahələrə suyun çatdırılması üçün 570,7 kilometr kanallardan istifadə edilir. Həmin kanallar da torpaq məcralı kanallardır. Yay aylarında suyun azalması və torpaq kanallarda suyun dağılaraq itkiyə getməsinə gətirib çıxarır. Bunun qarşısının alınması üçün 2019-cu ildən başlayaraq kanallarda betonlaşma işlərinə start verilib.
“Oğuz rayonunda Oğuz kənd arxı deyilən yerdə 2 kilometrdən artıq kanalda betonlaşma işi aparılıb. İki keçid körpüsü inşa edilib. Bu il də 700 poqonmetrdə betonlama işinin aparılması və bir keçid körpüsünün inşa edilməsi planlaşdırılır. Həmçinin rayonumuzdakı 3 ədəd kanalda da layihə işləri hazırlanır və gələcəkdə bu kanalların betonlaşması nəzərdə tutulur”, - deyə idarə rəisi qeyd edib.
Rayondakı kanalların bəziləri meşə ərazisindən keçir. Bu ərazilərdə qurumuş ağacların budaqlarının və yarpaqların tökülməsi kanalların tez-tez lillənməsinə gətirib çıxarır. Ona görə bu kanallarda da mütəmadi olaraq təmizləmə işləri aparılır.
Oğuz rayonu dağlıq rayonu olduğu üçün burada tütünçülük daha çox inkişaf edib. Ona görə də bu ayın əvvəlindən idarə tərəfindən təmizləmə işləri aparılır ki, tütün əkini zamanı su problemi yaşanmasın.
Qeyd edək ki, Oğuz rayonunda suvarma mövsümü ilə əlaqədar olaraq bu günə qədər Kərimli kəndinə gedən kanalda, Padar kəndinə gedən kollektorda, Qumlu çay arxında, Malıx kəndinə gedən Bucaqmal arxında və Xaçmaz kəndində arxın lildən təmizlənmə işləri aparılıb. Bu işlər hazırda da sürətlə davam edir.