Oğuz, 13 noyabr, AZƏRTAC

Bu ilin yaz daşqınları zamanı Qala çayda suyun səviyyəsinin artması Oğuzun Filfilli kəndinə ciddi təhlükə yaradıb.

AZƏRTAC xəbər verir ki, bu dağ kəndi mənbəyini Böyük Qafqazdan götürən və dağıdıcı gücə malik Qala çayın sağ sahilində yerləşir. Qala çayı yaz-yay aylarında güclü sel daşqınları ilə tanınır. Bu ilin yaz-yay aylarında dağlara yağan leysan yağışları çayda daşqınlara səbəb olub. Nəticədə kəndi selbasma təhlükəsi yaranıb. Digər tərəfdən sel daşqınları özü ilə gətirdiyi daş, qum, lilli su kəndə gələn körpünün altında qabarmalar, yüksəlmələr yaradıb. Hazırda körpünün elə yerləri var ki, məsafə üç metrə kimi yaxınlaşır. Bu isə növbəti daşqınlarda ciddi fəsadlara yol aça bilər.

Əməkdaşlarımız kənd sakinləri ilə görüşüb, müvafiq təşkilatların rəyini alıb.

Filfilli sakinləri ilə elə kəndin girişində, Qala çayın üzərindəki körpünün üstündə görüşürük. Diqqətimizi çayın gətirdiyi daş-çınqılın atması, körpü ilə çay arasında məsafənin daralması çəkir.

Sakinlər bildirir ki, yaz-yay aylarında Qala çayda sel-sular çayın səviyyəsinin artmasına səbəb olub. Müqayisə üçün deyə bilərik ki, 150 metrlik körpünün bəzi yerlərində çayla aradakı məsafə əgər əvvəllər 6-7 metr idisə, indiki halda 3 metrə çatıb. Bu isə gələcək sel təhlükəsinə ciddi zəmin yaradır.

Kənd sakini Ariz Məmmədov Qala çayın başlanğıc hissədən kəndə ciddi təhlükə yaratdığını, yaz daşqınları zamanı belə bir halın baş verdiyini deyir. Digər tərəfdən sel daşqınları əvvəlki illərdə kəndin əkin sahələrini, pay torpaqları da yararsız vəziyyətə salıb.

Məsələnin ciddiliyi yerli icra və bələdiyyə orqanlarını da narahat edir. Filfilli bələdiyyə sədri İlkin Ağayev qeyd edir ki, Qala çayı kəndin yuxarı hissəsindən yaşayış məntəqəsinə yönələrsə kəndin haradasa 70-80 faiz ərazisi tamamilə lilin, iri daşların altında qalma ehtimalı yaranacaq. Bundan əlavə çaya böyük daş, qum kütləsi gəldiyinə görə körpünün altı da xeyli dolub, suyun səviyyəsi yuxarı qalxıb.

Bəs müvafiq təşkilatlar sakinlərin narahatlığı ilə bağlı hansı qabaqlayıcı tədbir görməyi nəzərdə tutur? Məsələyə aydınlıq gətirmək üçün Oğuz Suvarma Sistemləri İdarəsi rəsmilərinə müraciət etdik.

İdarənin nümayəndəsi Ziya Camalov bildirdi ki, əhalinin müraciətləri nəzərə alınaraq Filfilli kəndi üçün yarana biləcək sel təhlükəsinin qarşısını almaq məqsədilə kəndin şimal hissəsində, Qala çayın sağ sahilində daş beton bəndin tikilməsi üçün 300 poqonometrlik tikintinin layihə smeta sənədləri hazırlanıb. Bəndlərin tikintisinə yaxın zamanlarda başlanılacaq.

Son anda sakinlərdən əldə etdiyimiz məlumata əsasən məsələ ilə əlaqədar bu günlərdə müvafiq qurumların rəsmiləri ilə görüşüblər. Kəndi gözləyən təhlükənin aradan qaldırılması istiqamətində yaxın aylarda işlərin başlanılacağına söz verilib.